Tag Archives: software librea

Sakelakotatik tiraka

0

MobileDevices-BasqueCountry

Noizean behin webguneko estatistikei begirada bat botatzeko ohitura dut. Gaurkoan sakelakoekin lotutako bisitak zelatatzeko izan da. Datuen arabera, nire webguneko bisitarien %20 inguru sakelakotik sartzen da webgunera. Datu horretan sakontzen hasi eta sakelako horien sistema eragilea eta gailuak zein diren begiratzea erabaki dut. Gailuen aldetik, lehen postuan iPhonea aurkitu dut garaile absolutu moduan. Gero beste gailu asko, Samsung, LG, Sony… estatistika orriak eta orriak, portzentaje oso baxuekin.

Sistema eragileari begiratuz, aldiz, Android da sistema eragileetan garaile erabatekoa, trafiko osoaren (ez bakarrik sakelakoen) %16rekin. Harrigarria dirudi, ezta? Gailuen merkatua kontrolatuta ere, Applek ezin izan du sakelakoen esparrua erabat menderatu.

Berehala etorri zait burura orduan Twitterreko geokokatutako mezuak baliatuz egindako sistema eragile mugikorren mapa bat (https://www.mapbox.com/labs/twitter-gnip/brands/). Mapa horretan argi ikusten da iPhone herrialde eta inguru aberatsagoetan erabili ohi dela. Android aldiz, baliabide gutxiagoko inguruetan zabaldu da gehien.

Zer esan nahi du jende askok iPhone eta gisako azken teknologiara atzipenik ez izateak? Alternatibarik ez dagoen kasuetan ezberdintasun sozialen areagotzea ekarri ohi du. Kasu honetan, Androidi esker, software libreari esker alegia, esan dezakegu jende askok iPhonearekin eskuratuko lukeena (edo hobea) lortzeko aukera izan duela.

Oraindik ere smarthphone bat lortzerik izan ez duen jende asko dago munduan, baina gero eta eskuragarriagoak dira; beste teknologia asko baino azkarrago iritsi dira leku askotara. Firefox OS sistema eragile berriak hori baliatuko du hedapena lortzeko. Sistema eragilea eta aplikazio biltegia ere libre eginez bere sistema erabiliko duten sakelako sinple eta merkeak atera nahi ditu.

Ez al da argia? Software eta ezagutza libreak desberdintasunak areagotzearen kontrako indar bat direla. Aurreko batean gertuko hedabide bat irakurtzen ari nintzela, etorkin gehien jasotzen zuten eskolak eta hezkuntza emaitza txarrak lotzen zituzten. Argi zegoen, eskolen kokalekuko egoera sozial zailak etorkin kopurua baino eragin gehiago zuela, baina horretaz ez ziren konturatu (nahi izan). Horretarako ere «sistema eragile» librerik lortuko bagenu…

Artikulu hau Berria egunkarian publikatu da Irlen Sarea atalean.

Ekuadorea

0
Iturria: Floksociety.org | Lizentzia: cc-by-sa

Iturria: Floksociety.org | Lizentzia: cc-by-sa

Software librearen aldeko hitzak egin dituzten estatu eta botere publikoak asko dira, baina errealitatean aldaketa sakonak egin dituztenak, gutxi. Horietako beste bat izan zitekeen Ekuadorko Gobernua ere, baina ez da horrela izaten ari. Ekuadorko Gobernua erabaki sendoak ematen ari da sofware librea jendartean txertatzeko.

Rafael Correa presidenteak 2007an software librea erabiltzeko mezu tinkoa zabaldu zuenetik , ekimen asko egin dituzte.

Funtzionarioen ordenagailu askok OpenOffice erabiltzen dute orain, baita Zimbra posta elektronikoa kudeatzeko zerbitzua ere. GNU/Linux ere instalatu dute Asanblea Nazionalaren ordenagailu gehienetan; hasieran OpenSuse eta orain Ubuntu. Urrunago ere joan nahi izan dute, eta bozketa sistemak kontrolatzeko eta gobernu eztabaiden kudeaketarako eCurul sistema erabiltzen dute.

Erabaki estrategiko bat da, eta hainbat puntutan laburbiltzen du bikain Ximena Amoroso, Ekuadorko Zientzia, Teknologia eta Berrikuntza idazkariordeak:

Komunitateak egindakoa da, era horizontal, kooperatibo eta gardenean garatzen da; balio gehigarria du; erabilpenari mugak ezartzen dizkioten beste ereduen aurrean tokiko ekonomia sustatzen du, mantentzea gertuko enpresekin aurrera eraman daitekeelako; subiranotasun teknologikoan aurrera egiteko ezinbestekoa, neokolonialismo teknologikoaren aurrean autonomia eskuratzeko. Eraldaketarako tresna estrategikoa da, eraldaketa sozial edo produktibo benetako batek beharrezko duen kohesio soziala lortzeko hizkuntza, kultura eta irisgarritasuna kontutan hartzen baititu.

Ezagutza eta software librean oinarritutako jendarte bat osatzeko oinarriak badaudela erakusten digu Ekuadorrek. Software librean ez ezik, adorea ez zaie falta herrialde honetako agintariei. Ekuador da Amerika osoan ezagutza libre eta irekian osatutako jendarte eredu berri batean lan egiten ari den bakarra.

Orain arte baliabide teknologikoen alorrean gutxien garatu diren tokietan agertu dira horrelakoak. Ekuadorrera begira egon beharrean nahiago nuke gureari buruz hitz egin, baina batzuetan ikasgaiak beste toki batzuetatik datoz.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

360°, ezer ez aldatzeko

2
I love data | Open Data eta Software Librea

Egilea: bixentro | Lizentzia: cc-by

Gauza berri eta ezberdinak egin nahi izatea oso gauza ona da. Horrela pentsatzen duten pertsonei esker gure jendarteak aurrera egiteko aukera du. Arlo guztietan dago berrikuntza txertatzeko aukera, baina berrikuntza ez dugu helburu huts bezala jarri behar. Helburu zehatz batzuk lortzeko hobetzen da ,eta horiek dira garrantzitsuenak.

Proiektu berri bat abiatzean, ilusioz «inork egin ez duen zerbait» egitea pentsatzen dugu. Errealitateak zaplastekoa eman —salbuespenak kenduta— eta zure aurretik beste norbaitek antzeko zerbait egin duela konturatu arte.

Hala ere, frustrazioan erori beharrean, zergatik ez baliatu? Sortuta dagoen hori hobetzeko bidetik hasi eta auskalo non buka daitekeen abentura. Historiako aurkikuntza eta berrikuntza asko horrela sortu dira. Chartreseko Bernardok ustez esandako, baina Newtoni edo Einsteini egotzi ohi zaien esaldi honek ondo laburtzen du metafora horren esanahia: «Nire ikusmena hain urrutira iritsi bada, nire aurreko erraldoien bizkar gainean igota nagoelako da».

Lehen adibidea Municheko Udalak (Alemania) 2005ean GNU/Linux mahaigain batera migratzeko proiektua hasi zuen. Zortzi urteren buruan dituzten 15.000 ordenagailuetatik, 14.000 jada migratu dituzte, eta bertan zituzten sistema pribatuak libreekin ordezkatu. Beste zenbait aplikazio eta ofimatika tresna ere aldatu dituzte bidean. Orain OpenOffice LibreOfficekin ordezkatu nahi dute. Bidean 10 milioi euro aurreztu dituzte.

Bigarren adibidea CKAN datu publikoak irekitzeko tresna da. Erakunde, enpresa edo taldeek beren datuak publiko egin nahi badituzte tresna honek bidea errazten du. Datuak publiko egiteaz gain, bilagarriak, erabilgarriak, kontsultagarriak… bihurtzen ditu. Data.gov.uk atari ezagunak CKAN du oinarri, baina orain eskuragarri dago erabiltzeko.

Askotan berrikuntza ez da gauza handietatik hasten, gauza errealetatik abiatu eta bisio argi batekin lortzen da berrikuntza txikiak handiago bihurtzea. Ez dugu zertan beti gurpila asmatzen jardun behar, batez ere, gurpil karratuak egiteko arriskua handia delako.

Nik behintzat nahiago dut 180º biratzeko prest dagoen pertsona, ezer aldatuko ez duen 360º-ko buelta osoa egitea proposatzen duena baino.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Elektroi askeak

4

Euskal Herriko Laborantza Ganbarak Lurzaindia sortu berri du. Erakunde honek espekulazioari aurre egin eta laborantzako lurrak babestea eta mantentzea izango du helburu. Bere eginkizun nagusia kolektiboki erosiak diren lurrak alokatzea da, beti ere irizpide zehatz batzuk segituz. Azken finean lurrarekin zailagoa bada ere herri lurren izaera kolektibo berri bat.

Badirudi beraz, aintzinako ohituretatik abiatuz hausnarketa berriak bide, lurrarekin ere aurretik beste arlo batzuetan eman diren eztabaida berak gauzatzen ari direla. Software libreak eta hacker kulturak gauza asko busti ditu zentzu honetan. Lurraren adibidea beharbada ez da honen seme zuzena, baina bai garai berri batzuen isla.

Lurraz ari garela, hau lantzeko beharrezko diren material eta tresneriak garestiak eta teknologia patenteak multinazional gutxiren esku daude. Horretaz gain, Euskal Herriko landa eremuetan esplotazio txiki eta ertainak dira gehiengo. Testuinguru honetan tresneria teknologikoa txertatzea zaila izan daiteke, inbertsioak eta teknologia eskuratzeko zailtasunak handiak direlako.

Gure baserritarrak ez dira arazo hau pairatzen duten bakarrak; oso ohikoa da ekoizleen artean. Horregatik eta subiranotasun kontzeptuari loturik, sortutako proiektu interesgarrien artean Open Source Ecology izenekoa dago. Proiektu honen helburuetako bat herri autonomo batek bere bizitza eta garapenerako beharko lituzkeen 50 tresnak garatzea, ekoiztea, dokumentatzea eta denontzako eskuragarri jartzea bilatzen du. Tresna hauetako batzuk traktorea, 3D inpresora, adreiluak egiteko makina, labe bat, energia ekoizteko haize errota… Informazio guztia webgunean aurkituko duzue, baina zerbait deigarria ikusi nahi izanez gero bideoen atalera jo dezakezue.

Global Village Construction Set – TED Talk from Open Source Ecology on Vimeo.

Ez dira lurrarekin eta hacker kulturarekin zerikusia duten proiektu bakarrak. Euskal Herrian gero eta ezagunagoak egiten ari diren kontsumo taldeek dituzten beharren inguruan adibidez proiektu berri bat sortu da. Letxuga/Timotes izeneko programa batekin, kontsumo kooperatiba edo talde baten kudeaketa errazagoa egin daiteke. Ekoizle eta kontsumitzaileen arteko datuak kudeatu, produktuen katalogoa mantendu, erosketa otarrak kontrolatu… Ohikoak diren beste zenbait lan errazteko pentsatua dago software hau.

Kontsumo taldeek ekoizle eta kontsumitzaileen arteko harreman zuzenago bat bilatzen dute distribuzio zirkuitu motzagoak eginez eta beraz energia aurreztuz. Hori lortzeko beste bide batzuk domotika bidezko kontrola erabiliz gure energia gastua eta erabilera hobetzea da. Ildo horretan OpenDomo proiektua oso interesgarria da.

Proiektu honek instalazioen kontrolerako sistema libre, ziur, inteligente eta erraza da. Bereziki prestatua automatismoetarako, domotikarako eta energia efizientzia bilatzeko. Etxearen funtzio ezberdinak kontrolatzeko balio du, argien, pertsianen, ureztatze sistemen eta abarren kontrola. Webgunean instalazio hauetako batzuk egiteko pausoz pausoko dokumentazioa ikusteko aukera izango duzue.

Noski horretarako elektrizitatea ere beharrezkoa da, baina horretarako ere proposamen interesgarriak sortzen hasi dira. Gure inguruan zabaltzen hasi den bat Goiener energia berriztagarrien sorkuntza eta erosle kooperatiba.

Avv3VgACEAAQhGd.jpg:large

Goiener eraketa
Goiener

Beraien helburua iturri berriztagarrietan ekoiztutako energia azken erabiltzaileei saltzea da. Horretarako orain, zertifikaturiko energia berdea erosi eta kooperatibako bazkideei saltzen diete. Etorkizunean energia berriztagarria sortzeko proiektuak martxan jartzeko bideak aztertuko dituzte eta bazkideek horretan ekarpenak egiteko aukera izango dute.

Artikulu hau Gaur8 astekarian publikatu da.

Erlazionatutako bidalketak:

Prest gaude?

1

Mozilla hitza aipatzean krema txokolatedun hura etorriko zaionik izango da, baina, Interneteko testuinguruan, Firefox nabigatzailea izaten da etortzen zaigun lehen gauza. Horrexegatik ezagutzen dugu Mozilla fundazioa batez ere, baina ez da hori egiten duen gauza bakarra, ezta beharbada garrantzitsuena ere.

Mozilla fundazioa kode irekiko Mozilla proiektuaz arduratzen den irabazi asmorik gabeko erakundea da. Haren zerbitzuek hiru oinarrizko ezaugarri bete ohi dituzte: kode irekikoak izatea, estandarretan oinarrituak egotea eta plataforma anitzetan erabiltzeko modukoak izatea.

Niretzat, Mozillak aurrera eramaten dituen proiektu interesgarrienen artean, Mozilla Labs dago. Oraindik garatzen ari diren edo fase esperimentalean dauden proiektuentzat sortutako ekimena da hori. Proiektu guztietatik, bi dira nire arreta berezia izan dutenak, eta biek harreman zuzena izan dezakete bideoarekin eta, beharbada, online irakaskuntzarekin: Big Blue Bottom eta Mozilla Popcorn.

Big Blue Button bideo konferentziak egiteko software libreko tresna interesgarri bat da. Horren bidez, besteak beste, bideoak grabatu, konferentzia publikoak egin, ikastaroak eman ditzakegu. Azken urteetan garapen interesgarria izan du, eta software libreko hainbat tresna integratuz, tresna baliagarri bat sortu du.

Mozilla Popcorn, aldiz, bideon gainean informazio gehigarria txertatzeko tresna interesgarria da. Proiektu horrek bideoetan jarioetako mezuak, komentarioak, txioak sartuz istorioak kontatzeko era elkarreragile eta berritzaileak sortu nahi ditu. Haren plataformara bideoak igoz, gainera, guk sortutakoa besteen eskura jarri eta hori ere berrerabiltzeko aukera izango du edonork.

Mozillaren moduko erakundeen lana oso garrantzitsua da gaur. Azken batean, bere lana irekitasuna, berrikuntza eta batez ere aukera berdintasuna posible egitea bilatzen duelako. Horregatik Internet eta teknologiaren testuinguruan software libre eta estandar irekien erabilera. Posible al dira beste arlo batzuetan balio komun horien alde egingo duten fundazio edo erakundeak sortzea? Beste arlo batzuetan ere horrelakoak sortzen hasteko eztabaida behintzat gauzatu behar genuke, baina prest gaude horretarako?

Artikulu hau Berria egunkarian publikatu da Irlen Sarea atalean.

Erlazionatutako bidalketak: