Tag Archives: Netflix

Krispeten leherketa

0

Berriro ere zinema industria aztoratuta dabil egunotan agertu berri den Popcorn Time programaren ondorioz. Filmak ikusteko aukera ematen du programa horrek era erraz batean; BitTorrent protokoloa erabiliz filmak denbora errealean ikusteko aukera eskaintzen du, itxaron behar izan gabe. BitTorrentek eskaintzen duen fitxategi trukerako aukera eta sinpletasuna uztartzen ditu, alegia.

Yify kalitateko filmak eskaintzen dituen Torrent biltokiko edukiak era erosoan eskaintzen ditu programak. Klasiko asko, baina baita azken filmak ere. Programak katalogoa egiteko aukera erosoa ematen du eta BitTorrent protokoloa baliatu arren, deskarga amaitzera itxaron behar izan gabe filma ikusteko aukera ematen du.

Orain arte industriaren estrategia bi noranzkoa izan da. Alde batetik, copyright legeak gogortzeko ahaleginean jardun dute, pertsonak eta baita estatuak mehatxatuz. Bestalde, erosotasuna, eskaintza eta prezio egoki bat uztartuta, Netflix bezalakoak jaio dira, etorkizuneko eredu moduan. Proiektu honek, ordea, bi alorretan arazoak sortzen dizkio industriari.

BitTorrent protokoloak p2p eduki banaketa bat ahalbidetzen du, eta, beraz, zaila izango da eduki hori sareetatik desagerraraztea. Lege bidez saia daitezke, baina sortzaileek ohar baten bidez argi utzi dute beren webgunean herrialdeko legeen arabera egindakoa legez kanpokoa izan daitekeela.

Plataforma berriei begira tresna erosoa izateaz gain, Mac OS X, Windows eta GNU/Linux sistemetarako dago eskuragarri. Software librea da, bere kodea edonork jaits dezake; beraz, desagertuta ere beste edonork programa har eta bana dezake.

Hori gutxi balitz bezala, sortzaileek argi utzi dute tresna irabazi asmorik gabe egin dutela. Teknologiarekin esperimentatu nahi zuten, hacker zaharrek bezala, posible zela demostratzeko eta disfrutatzeko gogoz. Ez dute publizitaterik, harpidetza sistemarik, ezta gaur egun ohikoak diren beste diru iturririk ere. Zaila, beraz, irabazi asmoarekin lotutako legeak aplikatzea.

Webaren 25. urteurrena ospatzen ari garen honetan, tresna hauek jaiotzean webak zuen ezagutza partekatzearen jarraipena besterik ez dira. Inoiz agortu ez den espiritua, agortzen zaila baita infinitua dena.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Holly bomb

0

Internetek gauza askotarako balio du. Entretenimendurako adibidez oso aproposa da. Bertan aurki dezakegun aukera, amaiezina da. Webguneak, jokoak, ikus entzunezkoentzako aplikazioak… Gauza asko. Aukera horren handia da, batzuetan Internetera konektatu eta zer egin ez dakigula. Gainera, egunero ateratzen dira zerbitzu berriak, aukera berriak, hobetuak… Ozeano erraldoia den sare honetan, gu hondartzaren bazter batean gaude. Burua uretan sartu eta, hara! Arrain bat! Egunero topa dezakegu zerbait berria. Askotan, hurrengo egunerako ahaztuko duguna. Eta bestetan, gure egunerokoan eragingo diguna.

Horretara dator Popcorn Time. Aste honetan atera dute eta dagoeneko famatu egin da. Filmak ikusteko balio du. Piratak, bai. Pirata horietakoak. Programa piztu eta katalogo erraldoia ateratzen zaigu. Filma aukeratu eta ikusten hasten gara. Horren sinple… Nola demontre egon gara orain arte hau gabe?

popcorn time

Software librean garatua dago eta edonork hobetu dezake. Laster berrikuntza gehiago gehituko dizkiote. Telesailak ikusteko aukera ere izango dugu eta mugikorra urruneko kontrol gisa erabiltzeko aukera izango dugu. Gainera, dagoeneko Urtzi Odriozolari esker euskaraz aurki dezakegu. Instalatzeko oso erraza da. Proiektuaren webgunera jo, instalatzailea deskargatu, eta instalatu. Windows, Os X eta Linux sistemetan instalatu dezakegu.

Teknikoki gehiago jakin nahi duenarentzat, jo dezala Github errepositoriora. Laburrean, Node.js teknologia erabiltzen du eta beste API zerbitzu batzuei esker egiten du bere lana. API horiek Torrent fitxategiak, azpitituluak eta filmaren inguruko informazioa biltzen dituzte. Popcorn Time aplikazioak, API hauetatik ateratako informazioa gurutzatu eta pantailaratzen digu modu ezin errazago batean. Azken finean, programa honek zera egiten du, kalitate oneko Torrent filmeak topatu eta streaming bidez ikusteko aukeran jarri.

Hollywood urduritzen hasi da jada. Netflix zerbitzua baino gauza sinpleagorik ez zegoen gaur arte. Baina orain hemen dugu Popcorn Time. Ez du erabiltzaile ez pasahitzik behar. Ez da ordaindu beharrik ere.

Oraintxe bertan ordea, Popcorn Time aplikazioaren deskarga esteka ez dabil. Esteka Mega zerbitzarietan zegoen. Megaupload zerbitzuaren ondorengoa. Eta badirudi ustezko Copyright eskubide batzuen urraketagatik kendu dutela. Aplikazioaren sortzaileek esteka berri bat jarriko dutela esan dute, ez kezkatu. Gainera, software librea denez, dagoeneko programa honen garapena ezin da modu errazean geldiarazi. Torrentak debekatu beharko lituzkete horretarako (ez dut oso ozen esango…).

Mega zerbitzuan edo beste deskarga zerbitzuren batean jarriko dute esteka berria. Mega zerbitzarietan deskarga fitxategia gorde izanak keinu bat egiten dio Kim DotCom-i. Kim Megauploaden sortzailea da, gaur egun Mega zerbitzuan bilakatu dena. Kim-ek badaki zer den Hollywood-i aurre egitea. Zeelanda Berriraino joan ziren FBIko agenteak bera atxilo hartzera. Bere gurutzada partikularrak oraindik dirau. Mega atera ondoren, Baboom zerbitzuan dabil lanean. Baboom musikarien ataria izan nahi du. Musika entzun eta erosi nahi dutenentzako, musikarien albisteak jasotzeko, bideoklipak ikusteko… Dagoeneko demoa bisita daiteke. Izena aproposa da. iTunes, Bandcamp, Twitter eta Grooveshark zerbitzuak koktelera batean sartu eta… Baboom! Itxura ona dauka. Audioen kalitatea bikaina da. Ikusi beharko da musikariek beraien salmenta plataforma bilakatzen duten. Kim zoriontsu da bere sofan krispetak jaten. Hollywoodek Baboom egiten ikusteko irrikitan.

 

Eguneraketa (2014/03/18)

Popcorn Time garatu zutenek proiektua utzi behar izan dute. Denbora gutxian izan duen arrakastagatik  jasan dituzten presioen ondorioz proiektutik aldentzea erabaki dute. Gaur egun proiektua Popcorn Team izeneko taldeak mantendu eta garatzen du.

Artikulu hau Gaur8 astekarian publikatu da.

Erlazionatutako bidalketak:

Netflixi buruz idatzi nahi nuen

1
netflix

Egilea: Taro the Shiba Inu |  Lizentzia: cc-by

Netflix.com ikus-entzunezkoen munduan erreferente bilakatu da. Telesailak eta filmak eskaintzen ditu nahieran. Netflix arrakastatsua izaten ari da Kanadan eta AEBetan. Kable eta satelite banaketa ere gainditzeraino iritsi da zenbait tokitan. Erraztasuna, prezioa eta esperientzia izan dira zerbitzuaren arrakastaren arrazoietako batzuk. Orain, Interneteko trafikoaren zati handi bat Netflix bidezkoa da. YouTuberekin batera trafiko gehien mugitzen duten zerbitzuetako bat da.

Azken astean, arduradunek Bittorrent bidezko trafiko «pirata» jaitsi izanaren arrazoia Netflix izan dela zabaldu nahi izan dute. Egia da Bittorrent bidezko trafikoa jaitsi dela, baina albistearen atzean gezurrak ere badaude. Alde batetik, Bittorrent protokolo bat da, HTTP izan daitekeen moduan. Bere lana, tamaina handiko fitxategien garraioa ahalbidetzea da. Protokolo horrek erabilpen asko ditu. Protokoloa sortu eta mantentzen dutenen aldetik ez da inoiz «pirateria» sustatu. Fitxategien trukerako asko erabili izan bada ere, Pirate Bay atari ezaguna kasu, beste asko dira protokoloak dituen erabilpenak; ikerketa munduko datu eskergak mugitzea, adibidez.

Protokolo bat izaki, ez dago zertan zerbitzu zentralizatu eta komertzial batekin neurtu. Bittorrenten sortzaileek trafiko hori murrizteko ahaleginetan ari dira, 2009an sartu zuten µTP azken aldaketa adibidez. Ezberdintasuna argia da, beraz. Interneteko neutraltasunaren eta azpiegituraren alde egiten du. Netflix zerbitzu interesgarria izan daiteke, baina hor egongo dira beti p2p banaketa ereduak, fitxategi truke librea sustatzeko, Interneteko oinarrizko neutraltasuna defendatzeko. Netflix desagertzen denean Bittorrent hor egongo da.

Lerro hauek bukatzen ari nintzela, Espainiako Auzitegi Nazionalak berriro ere adierazpen askatasuna urratzen duen erabaki bat hartu du, eta hedabide digital bat ixteko agindua eman du. Zutabe honetan behin baino gehiagotan aipatu izan dudan AteakIreki.com itxi eta beren sare sozialetako kontuak ere itzaltzeko eskatu du epaileak. Orain arte idatzitakoak erabaki horiekin zentzu gehiago hartzen du oraindik. Bihoakie nire elkartasuna eta behar duten laguntza guztia.

Artikulu hau Berria egunkarian publikatu da Irlen Sarea atalean.

Erlazionatutako bidalketak: