Tag Archives: jokoak

Flappy Bird

0
flappy_bird

Egilea: Naka Hide | Lizentzia: cc-by

Arrakasta izugarria lortu duen sakelarako joko baten izena da. Vietnamen, GEARS estudioak sortutako joko sinple, dibertigarri eta mendetasun sortzailea. Sareko dendetan izandako deskarga kopuru izugarriak egin zuen famatu aste gutxi batzuetan; orain ez duzu inon aurkituko.

Nguyen Ha Dong gaztea dago arrakastaren atzean, bera baita GEARS bideo jokoak garatzeko estudioa. Bera bakarrik. Jokoak garatzea du afizio, eta horrela egin ditu beste hainbat. Orain arte, eginiko beste jokoetako bat besterik ez zen Flappy Bird. Arrakasta iritsi arte.

Gazteak, arrakastari ezin eutsi, eta bere Twitter kontuan adierazi zuen jokoa kentzea erabaki zuela. Zurrumurruak izan dira nagusi orduz geroztik. Jokoan erabilitako hodiak Mario Bros-enen antzekoegiak zirela zioen horietako batek, baina ez dirudi hori izan denik arrazoia.

Txoriak hodien artean mugitzeko mekanika sinple bat darabilen joko hau mendekotasun handia sortzegatik ezabatu omen du sortzaileak. Haren ustetan, 10 minutu ondo pasatzeko izan behar zuen jokoak. Jendearen arteko lehiak eta sortutako gose izugarriak beldurtu dute.

Ziur, halere, bere familia eta inguruan egunean publizitateagatik 50.000 dolar irabazteak eta nahigabe lortzen ari zen famak ere eragina izan dutela. Jokoaren arrakastak bere eguneroko bizitza zapuztu duela ere aipatzen zuen bere Twitterreko mezuetan.

Jende askok arrakastaren ondorio kaltegarrien inguruan hitz egin du. Horiek jakinak dira. Interesgarriagoa egiten zait joko dinamika horien indarrean jartzea arreta. Zergatik ez joko dinamika horiek beste arloetara eraman? Horixe da, gamification bezala ezagutzen dena gaur egun.

Flappy Bird jokoa ez da zerbait berria, esango nuke aspaldi asmatutako zerbaiten bertsio berritze bat besterik ez dela. Gure planteamendu, egiteko forma, jarduerak… berriro definituko bagenitu joko dinamikako zenbait elementu era egokian erabiliz?

Ongi eginez gero, ideia bikaina izan daiteke; jakin bestela ere beste batzuk ari direla horretan. Geroz eta gehiago dira era horretako estrategiak supermerkatuetan, sareko erosketetan, hezkuntzan, jendartean… erabiltzen ari diren talde, erakunde eta enpresak. Ikusteko dago ea dinamika horiek ekartzen dituzten onurak, ea arrakastarik duten eta ea arrakasta hori ona den.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Steam, palankatik tiraka

0
Egilea: | Lizentzia:

Egilea: Valve Corporation | Lizentzia: Copyright

Google enpresa jaio zenean, bilatzaile bat besterik ez zen. Gaur egun, ordea, zerbitzu desberdin asko eskaintzen ditu eta bere diru iturri gehienak publizitatetik eta enpresei/administrazioei eskaintzen dizkien zerbitzuetatik datoz. Gainera, gehienok erabiltzen ditugun Android mugikorren merkatuan ere irabazi handiak ditu Google enpresak. Mugikorrak entretenimendu gailu bihurtu zirenetik, Google berak bideo jokoen salmenta plataforma zerbitzuak eskaini ditu Google Play aplikazioaren bitartez. Bideo jokoen merkatua horrenbeste aldatu da, gaur egun Google sektoreko marka ezagunenetakoak diren Nintendo edo Sony berari gailendu zaiela. Horiek baino diru-sarrera handiagoak baititu kontsoletarako bideo jokoen salmentetan.

Ez da Google izan bideo jokoen merkatura salto egin duen bakarra. Bideo joko salmentak film salmentari aurre hartu zionetik, enpresa askok egin dute salto sektore honetara. Berrikuntza asko bide horretatik etorri dira, eta konpetentzia horrek eragin du sektorean nagusi diren enpresa handiek esfortzu handiagoa egin behar izatea posizioak mantentzeko.

Bada, “Half Life” bideo jokoa egiteagatik famatu egin zen eta orain artean Steam bideo jokoen sare sozial eta salmenta plataforma hobetzen aritu den Valve enpresak albiste garrantzitsua eman zuen aurreko astean: Steam OS, Linuxen oinarritutako sistema eragile berri bat, plazaratuko du entretenimendura zuzendutako zerbitzuak eskaintzeko asmoz. Horrekin batera, Steam Machine delakoak ere merkaturatuko dira, Steam OS exekutatzeko beharrezkoak izango diren PC edo kontsolak.

Berrikuntza nabaria da, orain arte kontsolen munduko enpresa handiek beraien merkatua estu-estu kontrolatu izan dutelako. Xbox, Play Station edo Wii bezalako kontsolek hardwarea modu itxian merkaturatu izan dute horretarako. Adibide horietan, fabrikatzaileak diseinatzen du hardwarea eta berak merkaturatzen du. Bideo jokoen erabiltzaileek edo hardware garatzaileen enpresek inongo aldaketarik edo hobekuntzarik egiteko aukerarik ez dute

Valve enpresak aurkeztu duen eredua, ordea, erabiltzaile garatzaile eta ingeniariei guztiz irekita egongo da. Hardwarea eta softwarea hobetzeko eta aldatzeko aukera egongo da. Horrek atea ireki eta gauzak asko errazten dizkie bideo jokoen garatzaile diren enpresa gazteei, baina baita ikasketa eta ikerketa prozesuetan murgilduta daudenei ere.

Horrek, aldi berean, Linux sistemetan garatzen diren bideo jokoei bultzadatxoa emango die. Liburutegi libreekin egiten diren lanak ugarituko dira, eta, aldi berean, liburutegi horiek garapen hobeak izatea ahalbidetuko du.

Garatzaileez gain, erabiltzaileentzako ere onura asko ekarriko ditu. Hardware fabrikatzaile asko egonik, aukera desberdin asko izango ditugu, jokalari bakoitzaren arabera egokitu ahal izango ditugunak. Prezioak ere asko merkatuko dira gaur egun merkatuan famatu diren kontsolekin alderatuta.

Baina teknologiei lotutako berrikuntzez gain, erabilerarekin zerikusia dutenak ere izango ditugu. Steam eta Steam OS sistemen arteko streaming bidezko konexioaren bidez, edozein ordenagailuetan (Windows, Mac OS edo Linux) instalatuta ditugun jokoetara jolastu ahal izango dugu, filmak eta telebista kateak ikusi ahal izango ditugu, eta musika ere entzun ahal izango dugu. Horrez gain, gure jokoak lagunekin konpartitu ahal izango ditugu beraiek lizentzia erosi beharrik gabe eta egun existitzen diren bideo joko plataformek eskaintzen ez dituzten beste aukera asko ere sortuko dira.

Gaur egun bideo jokoek bizi duten kaiola askatzera dator Valveren proiektu berria. Berak planifikatuta, baina erabiltzaile, sortzaile eta garatzaile guztiei irekita izango den proiektua. Hobekuntza interesgarriak ekarriko dituela segurua da, eta errentetatik bizi diren Microsoft, Sony, Nintendo eta abarrek kolpe izugarria jasoko dutela argi dago. Orain makinaria guztia martxan jartzea besterik ez da falta.

Artikulu hau Gaur8 astekarian publikatu da.

Erlazionatutako bidalketak:

Harresiak elkartzen

0

Erresistentzia betean ari dira Bulebarrean bildutako gazteak lerro hauek idazten ari naizen bitartean. Oihuak, besarkadak, txaloak… Gauean Ertzaintzaren bi atxilotze saiakera gainditu dituzte. Aske Gunean antolatu den herri harresia indartsu ari da lanean.

jendea_ordenagailuetan_ibiltzen

Egilea: AskeGunea | Iturria: AskeGunea Facebook

Bertatik bertara egonda bakarrik senti daiteke Bulebarrean bizitzen den indarra eta elkartasuna. Baina bertaratu gabe ere Aske Gunean bizitzen ari direna, hein handi batean, komunikatzea lortu dute. Komunikazio lantalde propioa du Aske Guneak. 24 orduz eta etenik egin gabe informazio guztia blog baten bidez eta sare sozialen bitartez komunikatzen ari dira. Kamerak, mugikorrak eta ordenagailu eramangarriak dira talde honen lantresnak.

Donostian gertatzen ari dena Euskal Herri osora bakarrik ez, mundu osora zabaldu nahi dute. Bertan, boluntario askori esker gertakarien kronikak hizkuntza desberdinetan idazten ari dira. Hala, zortzi gazteen aldeko manifestua bera ere bost hizkuntzetara itzuli dute. Auzolanean bideoak grabatu, itzuli eta muntatzen dituzte. Blogaren bitartez argazkiak ikus ditzakegu, datozen orduetako egitaraua begiratu, baita zuzeneko bideo emisioak jarraitu ere. Arkanoid bideo-joko bat ere moldatu dute Herri Harresia irudikatuz.

Hau guztia Twitter eta Facebook sare sozialetatik zabaltzen ari dira. Twitterrekoa bereziki, minutuz minutuko informazio jario bilakatu da. Gomendioak, animoak eta alertak etengabeak dira. Twitition zerbitzuaren bitartez “EAJri Herri Harresiaren parte izateko eta Aske Gunera Ertzaintza ez bidaltzeko deia” izeneko sinadura kanpaina abiatu dute. VisibleTweets zerbitzuarekin, aldiz, tabernetan, eskoletan, kalean lantokian edo pantaila bat dagoen edozein lekutan #askegunea traola jarraitzeko bisualizazioa prestatu dute. Lan horri guztiari esker Aske Gunearen mezua Interneten lau haizetara zabaldu ahal izan dute. Nazioartean ere medio desberdinetan publikatu dituzte zortzi gazteen inguruko berriak; hala, #basque8 espainiar Estatuan TT izatera iritsi da. Internet informazioz bete dute.

Zentsura ere bizitzen ari dira, aste honetan Aske Gunearen erdarazko hizkuntzen Twitter erabiltzaile kontuak itxi egin baitizkiete. Kontuok berriz ere martxan dauden arren, ekintza honek argi erakusten digu zerbitzu zentralizatu hauek eragin dezaketen kaltea gure komunikazio jardunetan. Sare zentralizatu hauen aurrean sare banatuak hobetzen eta zabaltzen joan behar gara (blog sareak, sare sozial banatuak…), aurrerantzean horrelako arazoak ekidin ahal ditzagun.

Komunikabide askok Bulebarrean geratzen ari denaren berririk ematen ez duten bitartean, etengabeko jarraipena egiten ari dira Argia (@larbelaitz) eta Info7 (@iontelleria); bertatik bertara ari dira informazioa ematen, zuzeneko audioak eta bideoak sareratuz.

Ez dakigu Bulebarreko harresiak noiz izango duen amaiera, baina Euskal Herrian sortzen ari den harresi partekatua ezin izango dute bota, ezin izango dute inguratu, ez baita leku bakarrean egongo. Harresi bakoitzaren atzean beste bat aurkituko dute.

Artikulu hau Gaur8 astekarian publikatu da.

Erlazionatutako bidalketak:

Bizitza jokoan

4

Joko bihur daiteke edozer? Edozer beharbada ez, baina jokoen bidez sortzen den atxikimendua izugarria dela argi dago, eta horrek asko balio du. Hainbeste da horren balioa, ezen munduko enpresa eta erakunde asko gamification deiturikoari garrantzi handia ematen hasi dira. Gamification terminoa jokoen teoriak eta mekanikak jokoetatik kanpoko arloetara aplikatzean datza. Estrategia argia da, jokoek dituzten zenbait baliabide erabili jendea erakartzeko eta atxikitzeko.

Joko guztiek dituzte arauen bidez eta ezarritako beharrezko oztopoen bidez, beti lortu nahi izaten da ondo pasatzea, plazera sentitzea, parte hartzea sustatzea eta konpromezua adieraztea. Horretarako, hainbat estrategia daude. Gehien erabiliak: gauzak bilatzea, puntuak, sailkapenak, mailak eta erantzuna. Estrategia horiek guztiak oso indartsuak dira, eta gauza askotarako balio dezakete. Enpresa handi ezagunek ere baliatzen dituzte atxikimendua lortu ahal izateko; Nike, BBVA, Pepsi… Asko hasir dira estrategia horiek erabiltzen, markak indartzeko.

Interneteko sare sozialetan Foursquare izan daiteke teoria horiek hoberen ilustratzen dituena. Hor ibiltzen garen tokietatik joan, eta mezu bat argitaratzean joko batean parte hartzen egongo bagina bezala da. Beste batzuek egindakoa ikusten dugu, sariak jasotzen ditugu edota aukera berriak irekitzen zaizkigu (zozketak, deskontuak, aipamenak…).

gamification

Hala ere, joko teoria gamification estrategietatik harago doa. Informatikan eta ekonomian, adibidez, oso kontuan hartzen dira era horretako teoriak. Horregatik, informatikari askorentzat ez da berria; etika hacker-a, adibidez, horretan dago oinarritua. Bizitza erronka bat da, eta erronkaz erronka aurrera egin, oztopoak gaindituz lortzen da satisfakzioa. Batzuetan, besteen errekonozimenduagatik, baina beste batzuetan lan bat berriro errepikatu behar ez izanak eramaten du hacker bat bere interes propioagatik zerbait gainditzera.

Konbentzimenduz aurrera egiten dutenek, beharbada, ez dute estrategia horien beharrik, baina beste askoren atxikimendua bilatzeko baliagarri izan daitezke. Khan Academyk, adibidez, hezkuntzarako baliatzen ditu, baina zergatik ez bizitza bera joko bat bihurtu? Irudika ezazue une batez gizartea hobetzen lagun dezakeen joko bat, zergatik ez?

Artikulu hau Berria egunkarian publikatu da Irlen Sarea atalean.

Erlazionatutako bidalketak: