Tag Archives: gamification

Errealitate Alternatiboko Jokoak

0
ingress2

Iturria: http://www.redferret.net/wp-content/uploads/2013/05/ingress2.jpg

ARG Alternate Reality Game esaten zaio ingelesez. Errealitatearen gainean beste narratiba posible bat lantzen dute, batzuetan paraleloa, beste batzuetan areagotua, baina istorio eta unibertso propio batean murgilduta. Ingress da horietako bat.

Googleren Android sakelako telefonoetarako beste esperimentuetako bat da Ingress. Jokoan, ikertzaile europar batzuek energia mota berri bat aurkitu berri dute. Energia horrek giza adimena kontrolatzeko aukera ematen duela uste dute. Batzuek energia berri hori gizakia beste maila batera igarotzeko erabili nahi dute; beste batzuek, aldiz, energia hori gelditzen den gizatasuna zaintzeko helburuarekin erabili nahiko dute.

Jokoaren inguruko unibertsoa askoz ere handiagoa da: liburuak, foroak, informazio berezia ematen duten atariak, bideoak…. Transmedia ikerketa baterako aproposa.

Jokoaren mekanikara bueltatuz, energia hori filtratzen duten atariak elementu garrantzitsuak dira jokoan. Atari horiek ez dira kasualitatez sortzen, herri eta hirietako leku berezietan kokatuak daude. Bi taldeen arteko lehia eta talde barnekoen arteko kooperazioan, atari horiek kontrolatu, eremuak eraiki eta babestu behar dira. Garrantzitsuena, hori egin ahal izateko, ez du balio etxean gelditzea, leku horietara joan beharko duzu.

Batzuentzat erokeria izan badaiteke ere, joko hauen bidez beste gauza batzuk ere lortzen dira: lekuak ezagutzea, gehiago ibiltzea, jendea ezagutzea… Ondorio negatiboak ere ekar ditzake, noski, baina neurria hartuta konturatzen zara joko hutsa baino gehiago direla.

Era honetako jokoek, turismoaren ikuspuntutik adibidez, aplikazio zuzena izan dezakete. Joko bat ez bada ere, Conectur Android aplikazioak badu joko antzeko dinamika bat ere. Aplikazioak, oraingoz, Donostia aldeko leku interesgarriak ezagutzeko aukera ematen du, eta Groseko, Uliako eta Pasaiako badiako ibilbideak proposatzen ditu. Lekuetako informazioa eskuratzeko leku horietara iritsi beharko duzu.

Jokoak joko, pertsona askoren geokokatutako informazioa, ibilbideak, elkarrekintzak eta ekintzek balio handia dute. Batzuek Big Data deitzen diote. Kontrolatzen duenak etorkizuna ezagutu eta modelatzeko ahalmena izango du. Hori bai, benetako «energia mota» berria.

Artikulu hau Berria egunkarian publikatu da Irlen Sarea atalean.

Txapa eman

0
WP10_badges

Egilea: | Lizentzia: cc-by.sa

Ziur informatika menderatzen duen lagunik baduzula; gainera, ziur lagun horren lanbidea ere badela. Informatiko izateak ezer gutxi esan nahi du, baina garatzailea, sare kudeatzailea edo analista bada ere, horietako askok ez du izango titulazio ofizialik.

Beharbada, beste arlo batzuetan baino gehiago, informatikan jendeak batetik eta bestetik ikasteko joera izaten du. Ikasketek hori eskuratzeko aukera ematen dizute titulazio baten bidez, baina, orain arte, mila bide egon dira nahi zuenak ikasi ahal izateko.

Informatika alorrean beti izan da horrela, eta, nire iritziz, gure lanbidean intrusismoa deitu izan denaren beste ikuspuntu bat dago. Beste alor batzuetan titulua ez duena intrusoa dela esan ohi bada, informatikaren alorrean, norbaiti deitzekotan, dituen gaitasunak besteen aurrean erakusteko gai ez denari esaten zaio. Era baikor batean kontatuz gero: gaitasunak erakusten dituenari aitortzen zaio bere papera informatika alorrean.

Eredu horiek aukera dute orain beste arlo askotara igarotzeko. Noski, medikuntza bezalako alorretan ez da gertatuko oraindik, baina bai, beharbada, beste batzuetan. Pasioa eta meritukrazia bezalako balioek garrantzi handia izan dezakete aurrerantzean.

Horrekin batera, eskuratutako gaitasunak eta horiek erakusten dituen erakundeak oraindik ere garrantzia izango dute. Halere, haien papera aipatu beste faktoreekin nahastu beharko dute. Hau da, tituluek oraindik garrantzia izango dute, baina pasioa eta meritukrazia erakutsi edo neurtzeko gaitasuna ematen duten tresnekin ere nahastuko dira.

Open Badges proiektuak horixe lortu nahi du. Hainbat bideren bidez jasotako ezagutzak baloratzeko eta jasotzeko aukera ematen du. Lortutako ezagutza bakoitzeko iruditxo bat, txapa bat lortzen da. Horrela, ikasle batek aukera du hainbat lekutan bildutako ezagutza txikiak biltzeko, adibidez, Mozilla Backpack-en bidez.

Bide horrek balio dezake ikasketa prozesu askotan kontuan hartzen ez diren gauzak neurtzeko. Zeinek daki; noizbait, beharbada, horrelako sistema batek tituluen balio bera edo handiagoa izan dezake lana bilatzeko garaian. Halere, eredu meritukratiko bakoitzak bere bideak garatzen ditu merituak lortu, eman eta erakusteko; eta horiek ez dakit txapa batean sartzen diren.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Bizitza jokoan

4

Joko bihur daiteke edozer? Edozer beharbada ez, baina jokoen bidez sortzen den atxikimendua izugarria dela argi dago, eta horrek asko balio du. Hainbeste da horren balioa, ezen munduko enpresa eta erakunde asko gamification deiturikoari garrantzi handia ematen hasi dira. Gamification terminoa jokoen teoriak eta mekanikak jokoetatik kanpoko arloetara aplikatzean datza. Estrategia argia da, jokoek dituzten zenbait baliabide erabili jendea erakartzeko eta atxikitzeko.

Joko guztiek dituzte arauen bidez eta ezarritako beharrezko oztopoen bidez, beti lortu nahi izaten da ondo pasatzea, plazera sentitzea, parte hartzea sustatzea eta konpromezua adieraztea. Horretarako, hainbat estrategia daude. Gehien erabiliak: gauzak bilatzea, puntuak, sailkapenak, mailak eta erantzuna. Estrategia horiek guztiak oso indartsuak dira, eta gauza askotarako balio dezakete. Enpresa handi ezagunek ere baliatzen dituzte atxikimendua lortu ahal izateko; Nike, BBVA, Pepsi… Asko hasir dira estrategia horiek erabiltzen, markak indartzeko.

Interneteko sare sozialetan Foursquare izan daiteke teoria horiek hoberen ilustratzen dituena. Hor ibiltzen garen tokietatik joan, eta mezu bat argitaratzean joko batean parte hartzen egongo bagina bezala da. Beste batzuek egindakoa ikusten dugu, sariak jasotzen ditugu edota aukera berriak irekitzen zaizkigu (zozketak, deskontuak, aipamenak…).

gamification

Hala ere, joko teoria gamification estrategietatik harago doa. Informatikan eta ekonomian, adibidez, oso kontuan hartzen dira era horretako teoriak. Horregatik, informatikari askorentzat ez da berria; etika hacker-a, adibidez, horretan dago oinarritua. Bizitza erronka bat da, eta erronkaz erronka aurrera egin, oztopoak gaindituz lortzen da satisfakzioa. Batzuetan, besteen errekonozimenduagatik, baina beste batzuetan lan bat berriro errepikatu behar ez izanak eramaten du hacker bat bere interes propioagatik zerbait gainditzera.

Konbentzimenduz aurrera egiten dutenek, beharbada, ez dute estrategia horien beharrik, baina beste askoren atxikimendua bilatzeko baliagarri izan daitezke. Khan Academyk, adibidez, hezkuntzarako baliatzen ditu, baina zergatik ez bizitza bera joko bat bihurtu? Irudika ezazue une batez gizartea hobetzen lagun dezakeen joko bat, zergatik ez?

Artikulu hau Berria egunkarian publikatu da Irlen Sarea atalean.

Erlazionatutako bidalketak: