Tag Archives: firefox os

Sakelakotatik tiraka

0

MobileDevices-BasqueCountry

Noizean behin webguneko estatistikei begirada bat botatzeko ohitura dut. Gaurkoan sakelakoekin lotutako bisitak zelatatzeko izan da. Datuen arabera, nire webguneko bisitarien %20 inguru sakelakotik sartzen da webgunera. Datu horretan sakontzen hasi eta sakelako horien sistema eragilea eta gailuak zein diren begiratzea erabaki dut. Gailuen aldetik, lehen postuan iPhonea aurkitu dut garaile absolutu moduan. Gero beste gailu asko, Samsung, LG, Sony… estatistika orriak eta orriak, portzentaje oso baxuekin.

Sistema eragileari begiratuz, aldiz, Android da sistema eragileetan garaile erabatekoa, trafiko osoaren (ez bakarrik sakelakoen) %16rekin. Harrigarria dirudi, ezta? Gailuen merkatua kontrolatuta ere, Applek ezin izan du sakelakoen esparrua erabat menderatu.

Berehala etorri zait burura orduan Twitterreko geokokatutako mezuak baliatuz egindako sistema eragile mugikorren mapa bat (https://www.mapbox.com/labs/twitter-gnip/brands/). Mapa horretan argi ikusten da iPhone herrialde eta inguru aberatsagoetan erabili ohi dela. Android aldiz, baliabide gutxiagoko inguruetan zabaldu da gehien.

Zer esan nahi du jende askok iPhone eta gisako azken teknologiara atzipenik ez izateak? Alternatibarik ez dagoen kasuetan ezberdintasun sozialen areagotzea ekarri ohi du. Kasu honetan, Androidi esker, software libreari esker alegia, esan dezakegu jende askok iPhonearekin eskuratuko lukeena (edo hobea) lortzeko aukera izan duela.

Oraindik ere smarthphone bat lortzerik izan ez duen jende asko dago munduan, baina gero eta eskuragarriagoak dira; beste teknologia asko baino azkarrago iritsi dira leku askotara. Firefox OS sistema eragile berriak hori baliatuko du hedapena lortzeko. Sistema eragilea eta aplikazio biltegia ere libre eginez bere sistema erabiliko duten sakelako sinple eta merkeak atera nahi ditu.

Ez al da argia? Software eta ezagutza libreak desberdintasunak areagotzearen kontrako indar bat direla. Aurreko batean gertuko hedabide bat irakurtzen ari nintzela, etorkin gehien jasotzen zuten eskolak eta hezkuntza emaitza txarrak lotzen zituzten. Argi zegoen, eskolen kokalekuko egoera sozial zailak etorkin kopurua baino eragin gehiago zuela, baina horretaz ez ziren konturatu (nahi izan). Horretarako ere «sistema eragile» librerik lortuko bagenu…

Artikulu hau Berria egunkarian publikatu da Irlen Sarea atalean.

Google I/O 2013: Zer berri?

2
google_io_2013

Egilea: Tregoning | Lizentzia: cc-by

Urtero egiten dira Google I/O konferentziak. Googlek azken berrikuntzak erakusteko eta publikatzeko erabiltzen ditu konferentzia hauek. Mundu osoan ikusmira handia sortzen dute eta konferentzietan agertzen diren datuak blog eta medio askotan azaltzen dira. Azken aste honetan 200.000 orrialde baino gehiago idatzi dira Interneten Google I/O konferentziari buruz.

2013ko edizio honetan mugikortasuna, eta bereziki Android, izan dira protagonista nagusiak. Mugikortasunaren merkatua etengabe doa goraka eta Google berarentzat berebiziko garrantzia dauka. Aurtengo albiste nagusienetako bat, azken urteetan izan den moduan, Android mugikorren aktibazio kopurua izan da. Dagoeneko, 900 milioi gailu aktibatu dira Android sistemarekin. Eguneko 1,5 milioi gailu aktibatzen omen dira.

Googlek goranzko joera hori baliatu nahi du eta azken hilabete eta urteetako joerari eusten dio. Google+ indartzen ari da, eta, honen ekosistema, handitzen. Google+ proiektuaren logikatik kanpo geratzen diren egitasmoak deuseztatu eta beste asko bertara batu dituzte. Norabide horretan aurkeztu dute Google+ bertan integratuta datorren Hangaouts berria. “Integrazioa” izan da aurtengo hitz gakoetako bat. Gaur egun Google Talken egin daitezken ekintzak egin ahal izango dira, eta, gainera, argazkiak eta bideoak partekatzeko aukera ere egongo da. Talk ordezkatzera dator Hangouts, baina oraindik “integrazio” gehiago falta dituela dirudi. Ez dirudi SMS zein Google Voice zerbitzuen bateratzea oraingoz egingo dutenik, baina, aldaketa honekin, WhatsApp, SpotBros eta antzeko aplikazioei aurre egitera dator Google.

Bat-bateko mezularitzaz bakarrik ez, konferentzian jokoez ere aritu dira. Jokoen merkatuaren goranzko joerari ere zerbitzu berriak eskaini dizkio Googlek. Google Play Games izan da aurkeztu duten jokoen plataforma sozial berria. Famatuagoak diren Xbox Live edo Apple Game Center ezagunen antzeko zerbitzuak eskainiko ditu. Googlek jokoen garatzaileei baliabide berriak eskainiko dizkie. Baliabide horiei esker, jokoen partidak hodeian gordetzeko aukera izango da, lorpen sistema bateratuko da, on line klasifikazioak izango dira, jokalari anitzen arteko jokoak… Zerbitzu horiek guztiak Android jokoetan inplementatu ahal izango dira. Orain arte Googlek utzitako hutsune horiei esker sortu izan dira antzeko zerbitzuak ematen dituzten plataformak, baina, hemendik aurrera, Google etxearen apustu berri honekin, etorkizun iluna izango dute.

Eta jokoen plataformetatik, musikaren plataformara. All Access izeneko zerbitzua ekarri digu Googlek. Denok ezagutzen dugun Spotify zerbitzuari konpetentzia egitera datorren zerbitzu berri honek, Google Play Music zerbitzarietan dagoen musika guztia entzuteko aukera emango digu, tarifa lau bat ordaintzearen truke. Tarifa lau horren prezioa 10 dolar ingurukoa izango da. Guk gustuko dugun musika guztia ez da on line zerbitzu hauetan izaten, baina Googlek gure musika igotzeko aukera ere emango digu (Groovesharken bezala), edozein momentutan, edozein lekutan gaudela, guk nahi dugun musika entzuteko aukera emanaz.

Berrikuntza gehiago ere aurkeztu dituzte: Google Now, Google Maps, Google Play for Education… Baina gehienak aldaketa txikiak edo aurreikusitako hobekuntzak izan dira. Google proiektu berritzaile askotan sartuta dago, baina ez du interes handirik horien inguruko informazioa oraindik zabal dadin. Android 4.3 bertsio berriaren hutsunea ere nabaria izan da. Android software librea dela askotan esan izan dugu, baina kodearen zabalpenak gero eta konplikatuagoa dirudi. Android komunitatearen garatzaileen haserrea eta mesfidantza nabaria da, eta, egunetik egunera, goraka doa. Android sistema nagusi da mugikorren merkatuan, baina datozen hilabeteetan publikatuko diren sistema mugikor berriekin, Firefox OS sistemarekin batez ere, posizio hori mantentzea ez zaio orain arte bezain erraza egingo. Azkenaldian, ekitaldi mota hauek sortzen duten ikusmira, bertan aurkezten duten informazioa baino garrantzitsuagoa izaten da. Google ere Apple beraren antza hartzen ari da

Artikulu hau Gaur8 astekarian publikatu da.

Erlazionatutako bidalketak:

Firefox OSen keinua

4
ZTE Open and Firefox OS

Egilea: robpegoraro  | Lizentzia: cc-by-nc-sa

Informatikari Euskaldunen Bilkuraren 2013ko jardunaldia izan da Donostiako Miramonen. Aurtengoa informatikaren eta sakelakoen inguruan izan da, eta 250 pertsona baino gehiago elkartu gara.

Euskarak gai hauetan publikorik erakartzeko gaitasunik ez duela ezeztatzeko balio izan du. Sortutako interesa erabatekoa izan da, eserleku guztiak betetzeraino, eta, hara bildutakoek erakutsi duten bezala, gaitasuna ere sobera dago gure artean.

Bereziki, Julen Ruizen hitzaldia izan da interesgarria. Firefox OS sakelakoentzako sistema eragileari buruzko informazioa eman digu. Azken asteetan, Firefox OS albiste izan da, garatzaileentzako sakelakoak lortzeko aukera eman duelako.

Hala ere, hortik harago ere joan da Julenen hitzaldi erradikala. Erradikala, bai, baina ez bortitza edo bat-batekoa izategatik, baizik eta errora joan delako. Sakelakoen ekosistemetan aplikazioa erroa dela sinetsarazi nahi badigute ere, erroa weba dela nabarmendu du. Horixe da, Firefox OS-ek proposatzen duena. Denok ezagutzen ditugun teknologia estandar horiek oinarritzat hartuta sakelakoentzako ekosistema irekiak sortzerik badagoela.

Errora ez ezik, sustraietara ere jo du Julenek, kasu honetan Mozilla komunitatea aipatzeko. Mozilla proiektua aurrera eraman duen komunitate globala baita proiektu honen bultzatzailea. Komunitatearen garrantzia azpimarratu nahi izan du, baina baita bere misioa ere, «gailua edo kokapena edozein dela ere, edozeinek atzi dezakeen weba sortzen laguntzea».

Sakelakoen aplikazioen eta Webaren arteko lotura zalantzan jarriko duenik izango da, baina Firefox OSen mezua argia da, eta Mozillaren misioarekin erabat bat dator. Aplikazioak baztertu behar ez diren aukera bat dira, baina ez da amaitu behar aplikazioen bidez webak ekarritako oparotasuna. Julenek esaldi batekin azpimarratu zuen: «Benetan natiboa weba da».

Ez dakit Firefox OSek arrakasta izango duen, baina ez ninduke harrituko urte pare batean %10-15eko merkatu kuota lortzea. Oraindik ere , egongo da esango duenik ez dela nahikoa gauzak aldatzeko, baina Ernaieko gazteek beren webgunea itxi ondoren ireki duten blogean esan bezala, keinu batekin hasten da dena.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Ziklo berria

7
kondratieff eta hanpatze zikloak

Beste ziklo garrantzitsu batzuk Kondratiev eta Hanpatze zikloak (Wikipedia)

Internet, beste arlo batzuk bezala, botere esparruak lortzeko leku bilakatzen ari da. Urte askotan askatasun eremu bakarrenetakoa izan denak gero eta zailagoa du kontrol horietatik ihes egitea. Hala ere, besteekin konparatuz, hasieratik posible egiten zuten protokoloak, hau da arauez osatutako gunea izaki, askatasuna ezagutzeko aukera eman digu, eta horri kontra egitea zaila izango da.
Kontrolatzeko saioak etengabeak dira, eta gaur egun, esparru txikienetik handienera ikusten dira. Esango nuke ziklikoak ere badirela: askatasun irekiera berri baten ondoren, kontrol ahalegin bat dator. Blogek adibidez agenda banatu baten aukera ireki zuten, eta Interneteko sare sozialek, berriz, berriro ere agenda publikoaren informazio bitartekariei posizionatzeko aukera eman die.

Gailu mugikorren esparruan ere aldaketa garrantzitsuak izan dira. Biltegi batean dauden aplikazioak aukeratzea izaten da ohikoena, Android, iOS eta halako sistema eragile berrietan. Instala daitezkeen aplikazio baimenduen gune bakarra bilakatzen dira biltegi horiek, eta bertan ez daudenak instalatzen ezinezko edo oso zailak bihurtu.

Mota horretakoak dira kontrola eskuratzeko era berriak. Erabilera erraztasuna aitzakiatzat hartuta, beharrezkoak izango ez liratekeen monopolioak sortzen dira. Beharbada, tresna horietatik kanpo ere aplikazioak eskuratu eta instalatzea lor dezakezu, baina, betiere, zailagoa izango da.

Hala ere, badirudi hau aldatzen ari dela, eta gailu mugikorren adibidea hartzen badugu, hor nabarituko dugu argien. Firefox OS eta gailu mugikorrentzako Ubuntu sistema eragile berriek irekitasun apur bat gehiago ekar dezakete. Aplikazioak sortzeko erabiltzen dituzten teknologiak behintzat estandarragoak dira (HTML5, CSS3 eta Javascript batez ere). Horien arrakasta ikusteko dago, baina argi dago eztabaida piztuko dutela.

Gailu mugikorren alorrean eta teknologia berdinekin oraindik eremu libreenetako bat web-a bera da. Responsive diseinu ereduari esker webgune bera hainbat gailutara egokitzeko aukera dago. Benetan gailu mota gehienentzat estandarra eta inongo bitartekaritzarik gabeko eredu bakarra oraingoz.

Ziklo berri baten atarian gaudela uste dut. Batzuek blogak hiltzat eman zituzten, baina badirudi horiek zutik ziklo berriaren sarrera erakusteko gelditu zirela.

Artikulu hau Berria egunkarian publikatu da Irlen Sarea atalean.

Erlazionatutako bidalketak: