Archive | Talaios

RSS

WordPress garapenerako lan eskaintza

0

tau_wpTalaios kooperatiban WordPressen esperientzia duen norbaiten bila gabiltza. Datozen 6 hilabeteetan, WordPress garapenarekin eta bestelako web teknologiekin lagunduko gaituena.

Plugin eta theme garapenean murgiltzea izango da lanaren gehiengoa, baina gure kooperatibak martxan dituen beste proiektuetan lagundu eta kolaboratzeko aukera ere izango da.

WordPress garapenean esperientzia izatea bereziki kontutan izango dugu. Ikasteko eta irakasteko prest bazaude, eta gurekin lan egiteko interesa baduzu, izena eman gure lan poltsan.

 

Eraldaketarako hiru ideia solte eta proposamen zehatz bat

0

OlatuKoopTalaios kooperatibako kideak garapen ekonomikoari loturiko hainbat eztabaida, bilera, eta partehartze prozesuetan izan gara azken urte honetan, gaiak arlo ezberdinetan sortzen duen kezka eta interesaren erakusgarri.

Saio guzti hauetan gure ideiak azaldu eta zabaldu ditugu, kasu bakoitzean zegokion moduan. Orain berriz, azken hilabeteetan landu ditugun hiru ideia eta proposamen zehatz bat publiko egin nahi ditugu, interesa izan dezakeenak landu, garatu edo gurekin eztabaida ditzan.

Esan beharra dago ere BakalHau irlako biztanleek eskaini dizkiguten ideia, laguntza eta eztabaidarako espazioak ezinbestekoak izan direla lan honen garapenean.

[ePub] Eraldaketarako hiru ideia solte eta proposamen zehatz bat [pdf] Eraldaketarako hiru ideia solte eta proposamen zehatz bat

Sortu, eraldatu, elkarbanatu!

Sants-etik

0
Can Batllo

Can Batllo

Garai interesgarriak bizi ditu Kataluniak. Azaroaren 9rako galdeketa data ezarri ostean, gauza asko aldatzen hasi dira, beste batzuk azkartzen eta baita egoera berriak ere sortzen. Komunikazio eta teknologia proiektu askori ere horrela gertatzen ari zaie.

Aste honetan bertan Bartzelonako Sants auzoan egoteko aukera izan dut. Bertan La Burxa eta La Directa ezagutu ditut. Lehena, auzoko informazioa zabaltzen duen hedabidea; bigarrena, hedapen handiagoa bilatzen duen astekaria. Biek, papereko edizioa izateaz gain, edizio digitala ere badute.

La Directa-k erreferentzialtasun handia lortu du, eta barne prozesu batean murgilduta dago. Behar eta testuinguru zehatzetatik jaiotako hedabide batez ere militantea da, eta bere egituraketa eta bideragarritasuna lantzeko erronkaren aurrean dago orain. Bide horretan, komunitatearen, digitalaren eta paperaren arteko ohiko tentsioez gain, egitura juridikoari buruzko eztabaidan ere murgildu dira.

Historikoki auzo honetan mugimendu kooperatiboak indarra izan du, baina, batez ere, oraingoak eragin handia izango du, ez dago dudarik. La Directa-ren ondoan, Ciutat Invisible gune kooperatiboa dago, liburu denda bat baino gehiago da, eta apur bat harago, Coop 57 zerbitzu finantzarioen kooperatiba. Auzo osoa kooperatiba sare handi bat da, Barri Cooperatiu bat, alegia.

Hedabide horien egoera, ziurrenik, beste arlo askotan ere izango da; noski, lerro hauetan hainbeste landu diren beste arlo teknologikoagoak barne. Telekomunikazio eta energia alor estrategikoetan seguruenik ere burujabetzaren bidetik doazen proiektuak azkartzen joan beharko dute, testuinguru berriak bultzatuta.

Ez da kasualitatea Guifi sare libre eta neutral bat eraikitzeko proiektua eta Som Energia energia ekoizpen eta kontsumo kooperatiba bezalako proiektuek Katalunian hasi izana. Horiek eta beste batzuek ere indar berria hartuko dute.

Etorkizuneko jokaleku berri horietan, sektore estrategikoen egituraketa burujabea eta horri lotutako planteamendu ekonomiko berriak kontuan hartzea ezinbestekoa izango da. Hori egin ezean, zailagoa izango da jokaleku berri horietara salto egitea, beste loturarik sortu gabe.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Tau 1 – Urte bateko bizitza

13

Urte bat pasa da Unai, Beñat eta Gorkak Talaios Ahalduntzean Oinarritutako Sareak Kooperatiba Elkarte Txikia sortu genuenetik. Aingura altxatu genuen egun horretan efemerideak begiratu genituen: pobreziaren aurkako egun internazionala; AEBetako langile federazioak urte horretako maiatzaren 1etik aurrera lan jardunaldia 8 ordukoa izango zela erabakitzen du, horrek maiatzaren 1eko sarraskia eta ondorengo langileen nazioarteko eguna izango denaren arrazoia; Euskal Herrian Aieteko bake konferentzia izan zen eguna ere bada… Ilargia ere begiratu genuen eta egun horretan Merkurio zeharkatzen omen zuen, auskalo zer esan nahi duen horrek, baina gure oharretan erregistratu genuen.

Atzera begira gehiegi jarri gabe, urte bakar batean gauza asko egin ditugu, gure lanen zerrenda  ikusi besterik ez dago. Aholkularitza teknologikoak, hedabide digitalak, online dendak, aplikazio propioak, beti ere teknologia libreetan oinarrituta. Azken proiektuen artean daude adibidez, Donostia Gaur  jendartearekin harreman gertuago bat eramatera ausartzen ari den hedabide publikoa. Edo Fraisoro nekazal eskolarekin ilusio berezia egiten digun ahalduntze teknologikorako prozesu bat, non eredu ezberdin bat bilatuko dugun, teknologiaren laguntzarekin.

lanak2 lanak1

Ez da hezkuntzarekin dugun harreman bakarra. Ikastaroak, hitzaldiak, mintegiak… emateaz gain azken asteetan Mondragon Unibertsitateko LEINN graduan ere parte hartzen du Talaiosek. Ekintzailetasunaren sustapena bilatzen duen gradu honetan Gorkak Informatika ikasgaia ematen ari da. Oso pozik gaude, blog honen bidez irakurtzen dituzuen ideia eta praktika asko esparru akademiko horretan ere islatzen hasi direlako.

Baina, Talaiosek baditu beste batzuekin batera egindako proiektuak ere. Horrelakoak dira casa-aramendia.com eta lupulu.com . Lehena, tradizio handiko gozogile familia honen denda eta bigarrena garagardo ekoizpen artisauerako proiektua, Alez Aleko Joseba Karrikiri lagunarekin batera. Proiektu hauetan, komerzio elektronikoarekin esperimentatzen ari gara eta bietan DIY Do It Yourself, zuk zeuk egiteko bidea irekitzen duten kit edo produktuak saltzen ditugu, ikastaroekin batera.

Halere, produktu eta zerbitzuen ekoizpenetik haratago Talaios ez dago bakarrik. BakalHau/Blogsoviet komunitateko lagunak beti ditugu gertu, eztabaidatzeko, laguntzeko, elkarlanean aritzeko… Lagun asko eta konbertsazio interesgarriak edukitzeaz gain, elkarrekin komuna den etorkizun bat marrazten hasteko balio izan digu guri. Gurea bezalako enpresa komunitario bat ez da ezer bere komunitaterik gabe. Bertatik jaio zen Talaios eta espero dugu urte askotan komunitate horrek bizirik jarraitzea eta noski handitzea.

Orain arte, kontatu ez badugu ere urte bakar batean gure barne izaera komunitarioa handitu besterik ez da egin. Garraioa komunitarizatu genuen lehenik, garraio publikoan egiten ziren bidaiak kooperatibaren jardueraren parte izatera pasatuz. Ondoren, komunikazioa ere komunitarizatu genuen, telefono mugikor eta Internet sarbidea (etxekoa ere) gure lan tresnak ezinbestekoak direla erabaki eta esparru pertsonala eta lanaren arteko bereizketarekin bukatu genuen hor ere. Azkena oraingoz, elikagaiak izan dira, astero kooperatibak Basherri kontsumo talde bateko bi otarre jasotzen ditu eta bazkari kooperatiboekin ere esperimentatzen hasi gara.

Komunitatea indartzen saiatu gara, baina hortik kanpo, proiektu interesgarriei ere gure sostengua adierazi nahi izan diogu. Horregatik, urte honetan Fiare banku etikoaren eta Goiener energia kooperatibaren bazkide egin gara. Gure helburuekin erabat datozen proiektuak izanik keinu txiki honek, garrantzia handia izan du guretzat. Guk egin dugun moduan beste batzuek egiteko balio dezakeelakoan gaude gainera.

Aipatutakoak bezalako ideiak eta beste asko hedatzeko, komunikabideetan indarra jarri nahi izan dugu. Hedabide askok beren ateak ireki dizkigute horretarako, horrela Euskadi Irratia, Info7, HalaBedi, Gaur8, Berria eta noski TTanTTakun hedabideetako kolaboratzaile gara. Inplikazio maila ezberdinekin, baina denetan teknologiaren eta jendartearen arteko etorkizuneko erronkak aztertzen saiatzen gara. Gure ikuspuntutik noski, baina beti bizi garen jendarte honen errealitatetik abiatuz.

Etorkizunari begira jarrita ikasturte honetan bi proiektu garrantzitsu izango ditugu. Lehenak, beste proiektuek denboran sostengagarritasuna bilatzen saiatuko den bat eta bigarrena, etorkizunera begira jarriko den lan tresna bat. Oraindik ezer gutxi esan badezakegu ere, biak ilusio handiz lantzen ari gara eta espero dugu laster berri onak komunikatu ahal izatea.

Gure proiektu kooperatibotik haratago, garrantzitsua iruditzen zaigu, bizitzea tokatu zaizkigun garai interesgarri hauek beste batzuekin nola eraiki daitezken pentsatzea. Klima berezi bat sortzen ari dela ikusten dugu, klima horretan bide berriak jorratzeko beldurrik gabe gure ekarpena egingo dugu eta egitera goaz OlatuKoop-ekin. Badakigu gainera ez gaudela bakarrik eta horietako batzuk oso gertu sentitzen ditugu Sorgin Etxe, Abisald3sign, La Hormiga, Barking blogs, Gaueko, LauTech, Las Indias, eta beste lagun asko…

Sentitu, Pentsatu, Ekin, Koop

Albisteetan kooperatiben ereduaren mito bat bezala aurkeztu eta batzuek eraisteko gogoa argi azaltzen duten bitartean, beste eredu kooperatibo batzuk sortzen ari direla frogatzen ari gara. Errealitate gara eta etorkizuna izateko indarra badugu.

Elikadura burujabetza eta finantza etikoak Usurbil eta Zerainen

5

usurbilZerain

Bihar Talaios kooperatibako kideak Usurbilen izango gara, Etxalde baserritarren mugimenduakFiare banku etikoarekin batera antolatu dituen Elikadura burujabetza eta Finantza etikoak jardunaldietan. Bertan bi gai hauek landuko dira, eta egitaraua benetan interesgarria da, baina batez ere Ekonomia Solidarioaz hitz egingo da, ekonomia eraikitzeko alternatibez. Kontestu horretan guk Talaios Kooperatibak badugu zeresana, izan ere gure proiektua ere ekonomia erlazioak ulertzeko beste eredu baten arabera eraiki dugu eta etorkizuneko bidea lantzen ari gara. Ekonomiaa erlazio justuago batzuen eraikuntzan, birlokalizazioa eta egiteko modu etikoagoen baitan kooperatibek eta gure kasuan kooperatiba teknologiko txikiek daukagun papera eta ikuspegia azalduko ditugu.

Kontakizuna egingo dugu bertatik, eta ondorio batzuk zabaltzen saiatuko gara, baina gaian interesa baduzu, izena eman eta etorri gurekin.

Erlazionatutako bidalketak:

Euskal Esparru Komunikatiboaz mahaingurua

1

Ostegunean, euskal esparru komunikatiboaz aritu ginen Lorea Agirre (MU), Iñaki Soto (Gara), Iban Arregi (Berria) eta Talaiosen izenean ni neu Gorka. Joxemi Zumalabe hil zenez geroztik hogei urte igaro dira, eta, omenaldi gisa, haren lagunek jardunaldi hauek antolatu dituzte.

Lorea Agirre (MU)

Ikuspuntu akademikotik begiratu zion gaiari, baina gertutasunez. Komunitate errealen aipamena iruditu zitzaidan garrantzitsuena, baina birtualtasunari kontrajarrita bezala aipatu izanak ez zitzaidan mezu egokia iruditu. Komunitateak errealak badira, birtualak edo fisikoak izan daitezke, baina gehienetan gertatzen den bezala bi gauzak batera joaten dira. Elkarrekintza etengabea badago automatikoki elkar egoteko gogoa sortu ohi du.

Iñaki Soto (Gara)

Testuinguru politikoa azpimarratu nahi izan zuen. Gara egunkariaren zuzendaria denak, argi hitz egin zuen bere hedabideak komunitate baten beharren ondorioz sortua izatearen garrantziaz eta ondoriotan. Urteetan zenbait hedabideei emandako nagusitasunarekin bukatzeko eskatu zien erakundeei. Elkarlanaz eta sinergiaz ere hitz egin zuen, zenbait proiektu nabarmenduz, Hamaika TB eta errotatiba kasu.

Iban Arregi (Berria)

Berriaren izenean hitz egin zuen. Ibanek indar handia jarri zuen beren komunitatearen beharraz eta honekin batera hartutako azken erabakien inguruan. Probatzeko ausardiarekin batera, negozio eredu berriak garatzeko ausardia ere izan behar dela nabarmendu nahi izan zuen. Krisiaz jabe, erakundeei euskararentzako berezko politikak ezartzeko eskaria ere egin zuen. Honek ere, elkarlana nabarmendu nahi izan zuen eta Hitzak eta Goiena bezalako proiektuak ekarri zituen aditzera.

Gorka Julio - Joxemi Zumalabe Euskal Esparru Komunikatiboari buruzko hitzaldia MU, Gara, Berria, TalaiosGorka Julio (Talaios)

Neronek esparru berari begiratu nion eta “Euskal Esparru Komunikatiboa” sareen garaian nola kokatu daitekeen aztertu nuen. Hitzez hitz esaldi hori bera testuinguru globalean bere berezitasunak hartu behar dituela zehaztu nahi izan nuen.

  • Euskal = Meta-komunitatea: Komunitate ezberdinez osatutaeuskal hedabideakko meta-komunitatea elkar ezagutzeko gai garen pertsonez osatutako sare konplexua da. Gure meta-komunitatean euskara da ideia-sinbolo eta komunikazio tresna nagusia.
  • Esparru = Globala: Euskal komunikazio esparrua, euskal komunitate horri begirako komunikazioa bakarrik bada, zenbait kasutan testuinguru globalean motz geldi daiteke. Barrura begiratzeaz gain, kanpora, euskal komunitate horretatik kanpora komunikatu nahi dugunean beharrezkoa da “esparrua” alboratu eta globaltasun horretaz jabe izatea. Barnera begirako komunikazio izatetik, kanpora begirako komunikazio globala denean hori euskal esparru komunikatiboa da? Euskal esparru komunikatibotik mota honetako komunikazioa nola egiten da? Zalantzak erantzunak baino gehiago.
  • Komunikatiboa = Sare banatuak: Komunikazioak suposatzen duen igorle-hartzaile dikotomia aspaldi gainditu zen Interneten. Telegrafoaren oinordekoak diren hedabideak, agenda publikoaren monopolioa izan duten hedabideak, sare deszentralizatu horietatik sare banatuen paradigman murgildu behar dira. Bertan bitartekari izateak ez du posizioak bakarrik markatzen, bitartekaritza horrek onartua izan behar du eta hori irabazi beharreko saria da, sarean.

Sarrera horren ondoren beste zenbait gauza nabarmendu nahi izan nituen. Alde batetik zenbait proiektu interesgarri aipatu nituen sormenaren alorrean Argia eta agregazio/aukeraketa alorrean aldiz Sustatu.

Erlojuaren berrikuntzaren teoria ere aipatu nahi izan nuen. Erloju analogikoetan orratz bat bestea baino azkarrago joan ohi da. Orratz luzeak buelta oso bat eman duenean, orratz txikiak pauso txiki bat ematen du. Eredu hori da nire ustez hedabideek aurrera eraman behar dutena, orratz luzea proiektu esperimental txikiak dira eta orratz motza aldiz hedabideen bihotza diren hedabide handiak. Horretan Berriketan eta Gaur8 aipatu nahi izan nituen. Dudarik gabe biak proba ausartak; batez ere gremioak bizi dituen garaiotan.

Mezu positiboa eman nahi izan nuen, niretzako egoera txarra izanda ere beste batzuek baino hobeagoa delako. Ez dut daturik, ez eskatu, momentuz sentsazio bat besterik ez da, horrek daukan balioarekin. Hori bai, euskarazko edukia sortzeko beharra hedabideena bakarrik dela uste duenak jai du. Beharrezkoa da bakoitzak bere arlotik dituen baliabideekin edukia sortzea, blogekin piztu genuen grin hura, berriro ere pizteko garaia. Joxemi Zumalabe bezalako pertsona gehiago behar ditugu alegia.

Hala ere amaitzeko euskal hedabideei zor dioguna ere aitortzeko beharra ere sentitu nuen. Dudarik gabe, hauek egindako ekarpen handiena gure agenda publikoa eta Espainiakoa banatu izana da. Oraindik guztiz lortu ez badugu ere gero eta gertuago gaude helburu horretatik ere.

Informazio gehiago

Eguzkia beti garaile

4
Sol Invictus

Sol Invictus
cc-by: Jastrow

Sol Invictus edo Eguzkia garaile, horixe da egun hauetan ospatzen ari garena. Egun ilunenetan ere datozen etorkizunen haziak aurkitu ditzakegu, baina etorkizun horiek guk eraikitakoak izateko, egunero pixkanaka landu beharko ditugu. Lan horretan gabiltzanez, ospa dezagun.

Talaios Kooperatiban ospakizunerako arrazoi bat gehiago daukagu, hau baita gure lehen Gabona. Iluntasunean gogor lanean aritu ondoren pixkanaka pixkanaka gure eta gure inguruaren etorkizuna izango den tresnaren azaleratzea izango den Gabona. Iluntasun berriak ezagutuko ditugu baina gure egitura horretarako prestatzen ari gara, resilientea izateko, eta garai ilunetan eraldaketa bultzatu eta etorkizun hobeak sortzeko.

Bitartean datozen egunak ospakizun egunak izango dira Talaiosen, gure inguru hurbilarekin.  Baina gure sarea, eraldaketaren bidean behar beharrezkoa duguna, ez dugu ahaztu nahi eta horregatik Blogsoviet, Bakalhau eta beste sare proiektuetan lagun ditugunak egun hauek modu berezian ospatzera gonbidatu nahi ditugu. Urtero izango da Talaiosen sarearentzat ospakizun garaia, eta horretarako urtetik urtera sare zabalagoa izatea espero dugu. Datozen egunetan gure lonjatik pasatzen diren sarekideentzat ospakizun oparia daukagu. Etorri eta erabili klabea:

Eguzkia beti garaile!