Archive by Author

Interprest

0

Interprest sistema, interpretazio-zerbitzuak eskaintzeko plataforma teknologikoa da, Donostia 2016, Europako Kultur Hiriburuak, bultzatu eta Talaios Kooperatiba eta Biantik Kooperatibaren artean garatutakoa. Kostu txikikoa eta eramangarria, ekitaldi mota ezberdinetara egokitzen dena.

Haririk gabeko teknologia baliatuz, mugikorretan oinarritutako komunikazio-sistema erabuktzen du. Interpretearen mugikorrak mikrofono txiki baten bidez audioa bidali eta entzuleak bere mugikorrean jasotzen du.

Interprest_tau-08

Proiektuak teknologia irekien aldeko apustua egiten du hasieratik, komunitatearen esku jarriz garapen guztia.

Interpreteen audioaz gain, entzuleak testu eta irudi jarioa ere jaso dezake bere mugikorrean, ekitaldiari buruzko informazio gehigarri gisa. Irisgarritasun beharrei erantzuteko pentsatua dago funtzio hau, baita entzuleari ekitaldian gertatzen denaren ideia orokorra testu eta irudi bidez iristarazteko ere.

Interprest_tau-09

2016ko iraila-abendua bitartean Donostia 2016ren egoitzan (Easo kalea 43, Donostia) bi interprest gailu izango dira edonork erabiltzeko gertu. Inolako kosturik gabe, interpretazio beharrak dituzten ekitaldietarako eskuragarri jartzea da asmoa.

Interprest_tau-10

Holly bomb

0

Internetek gauza askotarako balio du. Entretenimendurako adibidez oso aproposa da. Bertan aurki dezakegun aukera, amaiezina da. Webguneak, jokoak, ikus entzunezkoentzako aplikazioak… Gauza asko. Aukera horren handia da, batzuetan Internetera konektatu eta zer egin ez dakigula. Gainera, egunero ateratzen dira zerbitzu berriak, aukera berriak, hobetuak… Ozeano erraldoia den sare honetan, gu hondartzaren bazter batean gaude. Burua uretan sartu eta, hara! Arrain bat! Egunero topa dezakegu zerbait berria. Askotan, hurrengo egunerako ahaztuko duguna. Eta bestetan, gure egunerokoan eragingo diguna.

Horretara dator Popcorn Time. Aste honetan atera dute eta dagoeneko famatu egin da. Filmak ikusteko balio du. Piratak, bai. Pirata horietakoak. Programa piztu eta katalogo erraldoia ateratzen zaigu. Filma aukeratu eta ikusten hasten gara. Horren sinple… Nola demontre egon gara orain arte hau gabe?

popcorn time

Software librean garatua dago eta edonork hobetu dezake. Laster berrikuntza gehiago gehituko dizkiote. Telesailak ikusteko aukera ere izango dugu eta mugikorra urruneko kontrol gisa erabiltzeko aukera izango dugu. Gainera, dagoeneko Urtzi Odriozolari esker euskaraz aurki dezakegu. Instalatzeko oso erraza da. Proiektuaren webgunera jo, instalatzailea deskargatu, eta instalatu. Windows, Os X eta Linux sistemetan instalatu dezakegu.

Teknikoki gehiago jakin nahi duenarentzat, jo dezala Github errepositoriora. Laburrean, Node.js teknologia erabiltzen du eta beste API zerbitzu batzuei esker egiten du bere lana. API horiek Torrent fitxategiak, azpitituluak eta filmaren inguruko informazioa biltzen dituzte. Popcorn Time aplikazioak, API hauetatik ateratako informazioa gurutzatu eta pantailaratzen digu modu ezin errazago batean. Azken finean, programa honek zera egiten du, kalitate oneko Torrent filmeak topatu eta streaming bidez ikusteko aukeran jarri.

Hollywood urduritzen hasi da jada. Netflix zerbitzua baino gauza sinpleagorik ez zegoen gaur arte. Baina orain hemen dugu Popcorn Time. Ez du erabiltzaile ez pasahitzik behar. Ez da ordaindu beharrik ere.

Oraintxe bertan ordea, Popcorn Time aplikazioaren deskarga esteka ez dabil. Esteka Mega zerbitzarietan zegoen. Megaupload zerbitzuaren ondorengoa. Eta badirudi ustezko Copyright eskubide batzuen urraketagatik kendu dutela. Aplikazioaren sortzaileek esteka berri bat jarriko dutela esan dute, ez kezkatu. Gainera, software librea denez, dagoeneko programa honen garapena ezin da modu errazean geldiarazi. Torrentak debekatu beharko lituzkete horretarako (ez dut oso ozen esango…).

Mega zerbitzuan edo beste deskarga zerbitzuren batean jarriko dute esteka berria. Mega zerbitzarietan deskarga fitxategia gorde izanak keinu bat egiten dio Kim DotCom-i. Kim Megauploaden sortzailea da, gaur egun Mega zerbitzuan bilakatu dena. Kim-ek badaki zer den Hollywood-i aurre egitea. Zeelanda Berriraino joan ziren FBIko agenteak bera atxilo hartzera. Bere gurutzada partikularrak oraindik dirau. Mega atera ondoren, Baboom zerbitzuan dabil lanean. Baboom musikarien ataria izan nahi du. Musika entzun eta erosi nahi dutenentzako, musikarien albisteak jasotzeko, bideoklipak ikusteko… Dagoeneko demoa bisita daiteke. Izena aproposa da. iTunes, Bandcamp, Twitter eta Grooveshark zerbitzuak koktelera batean sartu eta… Baboom! Itxura ona dauka. Audioen kalitatea bikaina da. Ikusi beharko da musikariek beraien salmenta plataforma bilakatzen duten. Kim zoriontsu da bere sofan krispetak jaten. Hollywoodek Baboom egiten ikusteko irrikitan.

 

Eguneraketa (2014/03/18)

Popcorn Time garatu zutenek proiektua utzi behar izan dute. Denbora gutxian izan duen arrakastagatik  jasan dituzten presioen ondorioz proiektutik aldentzea erabaki dute. Gaur egun proiektua Popcorn Team izeneko taldeak mantendu eta garatzen du.

Artikulu hau Gaur8 astekarian publikatu da.

Erlazionatutako bidalketak:

Kontrol soziala eta betiko demokratak

0
anonymous

Iturria: Taringa!

Anonymous sareko talde batek CESICAT fundazioak («CNI katalana» bezala izendatzen dutena) izan daitezken 38 dokumentu filtratu ditu. Informe horietan, Twitter zerbitzuaren bitartez sare sozialaren erabiltzaileei eginiko jarraipenak ageri dira. Jarraitutako erabiltzaileen artean, mugimendu sozial eta antikapitalistekin lotutako politiko, kazetari eta aktibistak aurkitzen dira.

CESICAT (Informazioaren Segurtasuneko Kataluniako Zentroa) Generalitatearen menpe dagoen fundazioa da. Hain zuzen ere, Enpresa eta Enplegu Sailaren menpekoa. Dokumentu hauek CESICAT fundazioak Mossos d’Esquadra Kataluniako polizia autonomikoarekin eta TB Security enpresarekin elkarlanean osatu zituen, 2012ko maiatzean. Dokumentuotan M-15 mugimenduan, Bankia eta La Caixa bankuen aurkako kanpainetan eta BCE gailurraren aurkakoan parte hartu zuten erabiltzaileen zerrendak ageri dira, baita erabiltzaile horiek bidalitako iritziak, argazkiak eta bideoak ere. Publikatutako dokumentuak hilabete bakarrean egindakoak badira ere, baliteke denbora luzez halako informeak egiten aritu izana.
Anonymous taldeak publikatu duen oharrak Masen Gobernuari eta ERCri egotzi die katalanen adierazpen askatasuna urratu izana. Gainera, iritzi politikoen araberako herritarren zerrendak inongo eskumen eta eskubiderik gabe osatu direla eta legezkoak ez direla salatu dute.

Mossoek eta CENICAT fundazioak dokumentu hauen jabe direla onartu ez badute ere, Dropbox eta Mega zerbitzuetan eskegita zeuden dokumentuak erretiratu egin dituzte, copyright eskubideen eskaerak eginez gainera. Dropbox zerbitzuan, adibidez, dokumentuak erretiratzeko eskaria CENICAT-CERT izenarekin egin dute. Iturri ziurra ez bada ere, badirudi CENICAT fundazioko kideek egin dituztela erreklamazio hauek.

Espioitza eta eraso zibernetikoak puri-purian dauden momentuan azaleratu dira dokumentu hauek. Aste honetan bertan, Espainiako Polizia Nazionalak Falangeko kide bat atxilotu du ezkerreko komunikabideak denbora luzez eraso izanagatik. Falangeko kide honek, Nodo50, InfoLibre, Diagonal, Periodismo Humano eta El Plural atariak eraso izan ditu botnet sareak erabiliz. Gainera, komunikabide horietako langileei mehatxuak bidaltzen ere ibili izan da atxilotu berri duten falangista. Botnet sareak mundu osoan barreiatuta dauden milaka ordenagailuz osatutako sareak dira. Ordenagailuok birus edo troiarrez infektatuta egon ohi dira, eta erasotzaileak ordenagailu horiek guztiak batera kontrolatzeko ahalmena du. Sare horiek webguneak eskariz saturatzen dituzte DDoS erasoekin. Alegia, milaka ordenagailuk eraso nahi den webguneari milaka eta milaka eskaera egiten dizkiete aldi berean, webgunearen zerbitzaria lanez gainezka jarriz, eta, ondorioz, zerbitzaria guztiz saturatuz. Iturri desberdinek diotenez, Falangeko kideak hiru botnet erabili omen zituen eraso guztiak egiteko. Botnet horiek erabiltzea ez da legala, baina Interneteko beste zerbitzu baten moduan kontrata daitezke.

Espainiar Estatuan bertan ere, eraldaketa sozialaren alde lan egiten dutenen aurka Internet gerra eremu normalizatu bilakatu da. Eta eraso horiek eskuin muturreko taldeen zein eskuineko gobernuen eskutik egiten ari dira. Askotan entzun izan ditugu STASI bezalako agentziek herritarren aurka egin omen zituzten kontrol praktiken inguruko salaketak, baina gaur egungo eskuineko gobernuek haur jolasen mailan utzi dituzte Alemaniako Errepublika Demokratikoan gertatutakoak. Gainera, kontrol neurriak askoz ere handiagoak izateaz gain, inpunitate osoz jokatzen jarraitzen dute. Eta jarraituko dute.

Artikulu hau Gaur8 astekarian publikatu da.

Erlazionatutako bidalketak:

Steam, palankatik tiraka

0
Egilea: | Lizentzia:

Egilea: Valve Corporation | Lizentzia: Copyright

Google enpresa jaio zenean, bilatzaile bat besterik ez zen. Gaur egun, ordea, zerbitzu desberdin asko eskaintzen ditu eta bere diru iturri gehienak publizitatetik eta enpresei/administrazioei eskaintzen dizkien zerbitzuetatik datoz. Gainera, gehienok erabiltzen ditugun Android mugikorren merkatuan ere irabazi handiak ditu Google enpresak. Mugikorrak entretenimendu gailu bihurtu zirenetik, Google berak bideo jokoen salmenta plataforma zerbitzuak eskaini ditu Google Play aplikazioaren bitartez. Bideo jokoen merkatua horrenbeste aldatu da, gaur egun Google sektoreko marka ezagunenetakoak diren Nintendo edo Sony berari gailendu zaiela. Horiek baino diru-sarrera handiagoak baititu kontsoletarako bideo jokoen salmentetan.

Ez da Google izan bideo jokoen merkatura salto egin duen bakarra. Bideo joko salmentak film salmentari aurre hartu zionetik, enpresa askok egin dute salto sektore honetara. Berrikuntza asko bide horretatik etorri dira, eta konpetentzia horrek eragin du sektorean nagusi diren enpresa handiek esfortzu handiagoa egin behar izatea posizioak mantentzeko.

Bada, “Half Life” bideo jokoa egiteagatik famatu egin zen eta orain artean Steam bideo jokoen sare sozial eta salmenta plataforma hobetzen aritu den Valve enpresak albiste garrantzitsua eman zuen aurreko astean: Steam OS, Linuxen oinarritutako sistema eragile berri bat, plazaratuko du entretenimendura zuzendutako zerbitzuak eskaintzeko asmoz. Horrekin batera, Steam Machine delakoak ere merkaturatuko dira, Steam OS exekutatzeko beharrezkoak izango diren PC edo kontsolak.

Berrikuntza nabaria da, orain arte kontsolen munduko enpresa handiek beraien merkatua estu-estu kontrolatu izan dutelako. Xbox, Play Station edo Wii bezalako kontsolek hardwarea modu itxian merkaturatu izan dute horretarako. Adibide horietan, fabrikatzaileak diseinatzen du hardwarea eta berak merkaturatzen du. Bideo jokoen erabiltzaileek edo hardware garatzaileen enpresek inongo aldaketarik edo hobekuntzarik egiteko aukerarik ez dute

Valve enpresak aurkeztu duen eredua, ordea, erabiltzaile garatzaile eta ingeniariei guztiz irekita egongo da. Hardwarea eta softwarea hobetzeko eta aldatzeko aukera egongo da. Horrek atea ireki eta gauzak asko errazten dizkie bideo jokoen garatzaile diren enpresa gazteei, baina baita ikasketa eta ikerketa prozesuetan murgilduta daudenei ere.

Horrek, aldi berean, Linux sistemetan garatzen diren bideo jokoei bultzadatxoa emango die. Liburutegi libreekin egiten diren lanak ugarituko dira, eta, aldi berean, liburutegi horiek garapen hobeak izatea ahalbidetuko du.

Garatzaileez gain, erabiltzaileentzako ere onura asko ekarriko ditu. Hardware fabrikatzaile asko egonik, aukera desberdin asko izango ditugu, jokalari bakoitzaren arabera egokitu ahal izango ditugunak. Prezioak ere asko merkatuko dira gaur egun merkatuan famatu diren kontsolekin alderatuta.

Baina teknologiei lotutako berrikuntzez gain, erabilerarekin zerikusia dutenak ere izango ditugu. Steam eta Steam OS sistemen arteko streaming bidezko konexioaren bidez, edozein ordenagailuetan (Windows, Mac OS edo Linux) instalatuta ditugun jokoetara jolastu ahal izango dugu, filmak eta telebista kateak ikusi ahal izango ditugu, eta musika ere entzun ahal izango dugu. Horrez gain, gure jokoak lagunekin konpartitu ahal izango ditugu beraiek lizentzia erosi beharrik gabe eta egun existitzen diren bideo joko plataformek eskaintzen ez dituzten beste aukera asko ere sortuko dira.

Gaur egun bideo jokoek bizi duten kaiola askatzera dator Valveren proiektu berria. Berak planifikatuta, baina erabiltzaile, sortzaile eta garatzaile guztiei irekita izango den proiektua. Hobekuntza interesgarriak ekarriko dituela segurua da, eta errentetatik bizi diren Microsoft, Sony, Nintendo eta abarrek kolpe izugarria jasoko dutela argi dago. Orain makinaria guztia martxan jartzea besterik ez da falta.

Artikulu hau Gaur8 astekarian publikatu da.

Erlazionatutako bidalketak:

Tor eztanda

3

NSA eta CIAko langile ohi batek Interneteko segurtasuna auzitan jarri du. NSAren espioitza proiektuak argitara emateak mundu mailako eskandalua eragin du. Snowden kasuak ezer onik ekarri badigu, segurtasuna eta pribatutasuna puri-purian jartzea izan da. Gaia ahoz aho ari da zabaltzen, eta, informazio jario horrek, Interneteko errealitatetik gertuago kokatzen gaitu.

Internet botere lehiarako beste eremu bat da. Botere/estatu ezberdinek kapital izugarriak inbertitzen dituzte Interneteko trafikoa gero eta gehiago kontrolatu ahal izateko. Egunero erabiltzen ditugun zerbitzuak ere lan horretan laguntzen ari dira. Snowdenen informazioaren arabera, Google, Apple, Microsoft, Yahoo… Enpresa horiek guztiek beraien zerbitzuetan atzeko ateak irekitzen dituzte espioitza programa hauetarako, guri buruzko informazio iturri zuzena izan dezaten. Interneten aske eta anonimo nabigatzeak prezio altua dauka. Gure egunerokotasunean ia ezinezkoa da praktika hori. Erabiltzen ditugun zerbitzu gehienek ez dituzte anonimotasuna eta pribatutasuna errespetatzen.

Baina, hala ere, Interneten badaude oraindik anonimotasunerako zirrikituak. Horietako zirrikitu askok ez dute  erabateko segurtasunik ematen, baina beharrezkoak dira: gobernu desberdinen kontrola saihesteko, informazio sekretua filtratzeko, disidentzia politikoa antolatzeko…

Interneten anonimotasuna lortzeko tresnetako bat Tor sarea da. Tor sareak Internetera egiten ditugun eskaerak nodo askoren artean ausaz errebotatzen ditu. Modu horretan, gure ordenagailutik Naiz.info webgunea ikusi nahi badugu, Tor sareak ausazko salto desberdinak egingo ditu, mundu osoan banatuak dauden Tor nodoetatik. Bat-batean, errebotatzeari utzi eta munduko ausazko puntu batetik Naiz.info webgunera eskaria egingo du, eta gero, webguneko informazioa Tor saretik pasa ondoren gure ordenagailura iritsiko da. Tor sareak ez du erabateko anonimotasuna ematen, baina beste segurtasun neurri batzuekin batera nahikoa izan daiteke egin behar dugun jardueraren arabera.

Tor sarea 2002. urtean jaio zen eta  AEBetan, Alemanian, Italian, Frantzian eta Espainian erabiltzen da batez ere. Orain arte 500.000 erabiltzailek erabiltzen zuten, baina azken hilabetean ezusteko nabarmena gertatu da. Hilabete eskasean sarea bost aldiz handiagoa egin da. Gaur egun 2500.000 erabiltzailek osatzen dute sarea eta oraindik ere joera goranzkoa dela dirudi. Harrigarria da gorakada horrekin sareak oraindik ere zutik jarraitzeko gaitasuna izatea, baina, erabiltzaile bazarete, nabarmena da ere izan duen abiadura beherakada. Teorian, gero eta erabiltzaile gehiago, orduan eta anonimotasun handiagoa lortzen da sarean. Baina Tor sarearen funtzionamenduari erreparatzen badiogu, horrek ez du zertan hala izan.

Tor sarean sartzeko erabiltzen dugun lehen nodoak gure informazioa dauka. Beharrezkoa du gurekin kontaktuan jartzeko. Baina ez hori bakarrik, sarearen azken nodoak badaki nora egin dugun eskaera. Nodo horiek erabat neutralak badira, ez dugu arazorik izango, baina botere/estatu batek nodo horien gaineko kontrola badu, Tor sarean gertatzen dena monitorizatu ahal izango luke. Sare guztia monitorizatzea oso zaila litzateke, baina, AEBetako Itsas Armadako ikerketa zentroak esan berri duenaren arabera, nodo batzuk kontrolatzearekin, denbora kontua da erabiltzaile jakin baten inguruko informazioa eskuratzea.

Hori guztia kontuan hartuta, etsaien baten asmo ilunetan ez pentsatzea ezinezkoa egiten da. Gero eta erabiltzaile gehiago badugu, orduan eta trafiko pilaketa gehiago sortzen dira, eta trafiko pilaketa horietan nodo azkarrenek bideratzen dute informazio gehiena. Jakina da, gainera, FBI, NSA eta antzerako agentziek Tor sareetan sarrera eta irteerako nodoak erabiltzen dituztela.

Tor proiektuko arduradunek ez dute argi oraindik erabiltzaile igoera ikusgarriaren atzean zer dagoen. Errusian indarrean jarri den lege anti pirata izan daiteke arrazoietako bat. The Pirate Bayk ateratako Pirate Browser tresna da aipatu duten beste arrazoi posibleetako bat. Baina datuak aztertu ondoren ez dirudi horiek direnik arrazoi nagusiak. Tor tresna garrantzitsua da baina kontu handiz erabili beharrekoa, orain, inoiz baino gehiago

Artikulu hau Gaur8 astekarian publikatu da.

Erlazionatutako bidalketak:

Amazoom

3
amazon

Egilea: Akira Ohgaki | Lizentzia: cc-by-sa

Amazonek Washington Post egunkari ezaguna erosi du. Jeff Bezos zuzendariak, Steve Jobs hil dela edo aprobetxatuz enpresa handietako CEO-en arteko onena izan nahi duela dirudi, baina zer dago mugimendu honen atzean? Zer da Amazon?

Amazon-ek azken urteetan bere negozioa den komertzio elektronikoa irauli du. Liburuetatik hasi eta beste mila gauza saltzera pasatu da enpresa. Komertzio elektronikoan lehenengoetarikoa izateak aukera handiak ireki dizkio enpresari eta bere nagusitasuna inposatzeko aukera izan du.

Honek, noski, beste zenbait arlotan eragina izan du eta Amazonen nagusitasunak eta egiteko era berriak arazoak sortu ditu. AEBetan 10.000 lanposturen galera eragin duela kalkulatu izan dute zenbaitzuek. Gehienak liburutegi independente eta txikietakoak.

AEBetan ez ezik Europan ere antzeko zerbait gertatzen ari dela edo gertatuko dela deritzote askok. Horregatik, zenbait herrialdetan neurriak eta laguntzak ezartzen ari dira, nolabait Amazonek sor dezakeen eragina lausotzeko. Britainia Handian eta batez ere Frantzian era honetako neurriak ezartzen hasi dira. Espainian, aldiz, oraindik ez dago argi zein neurri hartuko diren, baina editoreen gremioa presionatzen ari da jada.

Argi dago editore eta editorialen munduan gauzak berritu behar direla. Espainian eta Frantzian ere antzekoa da, liburuen prezioa oso neurtuta dago, ezin dira liburuak edozein preziotan saldu egoera berezitan ez bada. Printzipioz txikientzako defentsa bat izan daitekeena, kasu askotan arazo bihurtzen da, saldu ezin dituzten liburuak saltzeko aukerak galduz adibidez.

Gremio horrek dituen berrikuntzen beharraz haratago, Amazonek berarekin lehiatzeko arazo handiak sortzen ditu, eskalara jokatzen baitu oraindik. Komertzio elektronikorako enpresa honek banku, banatzaile eta azpiegitura beharrezkoen funtzioak ere baditu. Horrek kostuak murriztu eta beharrezko bitartekari bihurtzen du askorentzat. Ziur nago Euskal Herriko denda askok ere bezeroek eskatutako produktuak Amazon bidez erosi dituztela berriro ere saltzeko.

Lanpostuen galera aipatzen denean ere kontuz ibili behar dugu, baina ziur lanpostuetan eragina baduela. Hori bai, Amazonek komunikazio lana ondo egiten du, azkenaldian adibidez bolo-bolo dabil Amazonek 7.000 lanpostu sortuko dituen albistea.

Langile horien soldata “ona” izaten omen dela dioenik badago ere, informazio askok adierazten duten bezala, baina, langileen egoera ez da oso ona izaten. Biltegi askotan, sistema telematiko oso kontrolatuak erabiltzen dituzte, egunaren bukaeran langile bakoitzak bere produktibitate informeak jasotzeraino. Neurri horiek kontuan hartuta, biltegietan behintzat langileak baino errobotak behar dituztela dirudi.

Bada oraindik beste alor bat Amazon garrantzitsu baino ezinbesteko bihurtu duena. Beretzat erabiltzen zituen azpiegitura teknologiko asko handitu eta saltzen ditu orain. Arlo horretan Amazonek ez du ia areriorik. AEBetako gobernuak zenbait kasutan bereak baino hobeagoak diren azpiegitura hauek erabiltzeraino.

Washington Post-en erosketa era askotara uler daiteke, baina gogoratu beharko dugu, lehenik, egunkari hori bankuena zela, etengabeko zorra medio. Erosketaren atzean Amazonen negozioarekin erabat bateragarriak diren banaketa, komunikazio beharrak, salmenta puntuen hedapena eta informazioaren mundu digitaleko beste merkatu batzuetan esperimentatzea dago.

Amazonen aurrean oraindik badira aukerak: berezitasuna, txikitasunak, gertutasunak, teknologien merkatzea, DRMrik gabeko produktuak… Amazonek ondo egiten badu, besteok hobeto egin beharko.

Artikulu hau Gaur8 astekarian publikatu da.

Erlazionatutako bidalketak:

Oporretarako aplikazioak

7

Ohitura ona izaten da oporretara goazenean maletarekin batera, Android mugikorra ere prestatzea. Oporretan gaudela behar dugun informazio guztia, edo gehiena, gure eskuetan izatea lagungarria izaten da. Mota askoko opor bidaiak egin daitezke, eta hauetako bakoitzean modu bateko edo besteko informazioa beharko dugu. Informazio guzti hori behar dugunerako erabilgarri izateko, oporretara joan aurretik erabiliko ditugun beharreko aplikazioak identifikatu eta instalatu beharko ditugu.

Oporretan Google Maps askotan erabiltzen da. Bisitatzen ari garen hirian edo lurraldean kokatu gaitezke mugikorraren GPS-aren bitartez. Mugikorrean Interneterako konexioa baldin badugu, ez dugu arazorik izango Googlek ematen dizkigun datu guztietara sarbidea izateko. Aldiz, roaming-a aktibatu nahi ez badugu, oporretara atera baino lehen bisitatu nahi dugun lekuaren mapa deskargatu beharko dugu, oporretan gaudenean Internetik gabe mapa ikusi ahal izateko. Mapa aurretik deskargatzeko bi bide daude. Orain arte, aplikazioaren menuan, “konexiorik gabe erabilgarri” botoiari emanaz deskargatzen genituen beharrezko mapak. Baina azken astean, Google Maps apliakzioak 7. bertsiora egin du salto eta hemendik aurrera ez dugu deskargatutako mapak kudeatzeko aukerarik izango. Hala ere, antzeko aukera bat erabili daiteke nahi ditugun mapak offline kontsultatu ahal izateko. Orain, nahikoa da pantailan deskargatu nahi dugun mapa zatia aukeratzea, eta bilaketa gelaxkan “ok maps” idaztea. Estatu batzuetan oraindik ezin dira deskargatu, Espainia kasu, baina beste askotan zerbitzua erabilgarri dago. Aplikazioa egunero erabili behar ez badugu ere, momenturen batean estualdi batetik atera gaitzake.

Screenshot_2013-07-15-12-41-15Oporretara joateko hegazkina beharko badugu, Skyscanner aukera interesgarria izan daiteke. Hegaldi bilatzaileen artean bilaketa egin eta aukera merkeenak erakusten dizkigu. Erabilera errazekoa da eta aukerak azkar topatzen ditu. Edonora bidaiatzeko aukera ematen du eta hegaldia aukeratzerakoan erreserba egiteko helbide zuzenera berbideratzen gaitu.

Hegaldia lotuta dugula, lotarako lekua topatzea onena. Airbnb zerbitzuaren aplikazioa instalatu dezakegu horretarako. Airbnb partikularren etxeak, apartamentuak edo logelak alokatzeko balio duen sare soziala da. Aplikazioaren bitartez gure erreserba eta jabeen argibide guztiak jarraitu ahal izango ditugu. Zerbitzu honen bidez leku merkeak zein luxuzkoak topa ditzakegu. Aldiz, gure asmoa kanpinetara joatea bada, Youcamp eskura edukitzea lagungarri izan daiteke. Aplikazio hau ordainpekoa da, baina kanpinetik kanpinera mugitu behar badugu, balio duena ordaintzea merezi du.

Bisitatu nahi dugun tokia ondo ezagutzeko, beste bidaiarien proposamenak, beraien opor planak, argazkiak eta bestelako aholkuen bidez informatzea ondo etorriko zaigu. Minube aplikazioan webgunearen bertsio mugikorra topatuko dugu. Minube bidaiarien sare soziala da. Bertan bidaiarien aholkuak topatuko ditugu, gure bidaia ahalik eta gehien aprobetxatzeko erabili dezakeguna. Oporretan kirola egin behar badugu aldiz, Wikilock aplikazioa oso aukera egokia da. Bertan izen bereko sare sozialeko informazioa eskura izango dugu. Bizikleta, trekking, ibilaldiak eta askotariko kirolen ibilbideak aurkituko ditugu.

Oporretan gaudela, mugikorra erabiltzea batzuetan arazo bilakatzen da, bisitatzen ari garen herrialdean Interneteko konexiorik ez dugulako. Arazo hau ekiditeko eta wifi aske baten bila arratsalde osoa ez galtzeko, aplikazio gehiago instalatzea onena. Irtenbideetako bat Roamer zerbitzua dugu. Roamer zerbitzuarekin helburu dugun herrialdean aurreordaindutako SIM txartel merkea erosiko dugu, eta aplikazioak, gure betiko mugikor zenbakiaren deiak SIM berrira berbideratuko dizkigu. Gainera, Interneten ibiltzeko SIM berriaren tarifa merkea erabilgarri izango dugu. Beste irtenbide bat, Wifien mapak osatzen dituzten aplikazioren bat instalatzea litzateke (Adibidez: “WifiPass”, “instabridge” etab.). Aplikazio hauetan guregandik gertu dauden wifiak erakutsiko dizkigute eta jendeak konpartitutako wifien pasahitzak erabili ahal izango ditugu.

Oporretarako plangintza adina aplikazio daude instalatzeko prest, asko doakoak, beste asko ordainpekoak. Gure oporrekin hoberen bat datorren aplikazioak aukeratu eta instalatzea besterik ez dugu egin behar. Edo bestela, mugikorra etxean utzi eta besterik gabe, disfrutatu!

 

Artikulu hau Gaur8 astekarian publikatu da.

Erlazionatutako bidalketak:

«PRISMa» poliedrikoa

2

PRISM espioitza zerbitzuari buruzko albisteek mundua zeharkatu dute asteotan eta ez da gutxiagorako. Probak falta genituen, baina Edward Snowdenek argitara emandako informazioei esker Interneteko zerbitzu garrantzitsuen bidez ere espioitza egiteko balio duen tresna ezagutu dugu.

Edward Snowden CIArentzat eta AEBetako Segurtasun Agentzia Nazionalarentzako lan egiten zuen gazte bat da. Soldata aparta, familia eta bizimodu ona zituen, baina guztia kolokan jarri eta ezagutzen zituen zenbait informazio argitara ematea erabaki du. Hong Kongera ihes egin eta bertatik erabaki du informazio horiek zabaltzea.

Ez du famatua izatea helburu, nahiz eta hori saihestea ezinezkoa izango zaion dagoeneko. Berak emandako elkarrizketa batean, indarrean den espioitza orokor eta indiskriminatuarekin bukatzeko gogoa azaldu du. Barne beharrak eraman du Edward egin duena egitera.

Momentuz, aurkezpen baten zenbait diapositiba bakarrik ezagutu dira, baina informazio gehiago ere egon daitezke ate joka. Hala ere, ezagututakoa nahikoa izan da hautsak harrotu eta Microsoft, Yahoo, Google, Facebook, You Tube, Skype edota Apple bezalako enpresen inplikazioa azaleratzeko. Noski, gehienek kaleratutakoa ukatu egin dute, eta, egia esan, ez dago oraindik batere argi nolakoa izan den enpreson parte hartzea aferan honetan.

Hori bai, Snowdenen keinuak sarean zalaparta handia sortu du. PRISM programa bertan behera uzteko eskatzeko kanpainak abiatu dira dagoeneko. Horien artean ezagunena Stop Watching Us dugu, eta, sustatzaile nagusienen artean, besteak beste, Mozilla, Reddit edota EFF Electronic Frontier Foundation daude.

EFF aspalditik horrelako eskubide urraketen aurka lanean diharduen fundazioa da. Bere webgunean mezu elektroniko bidezko beste salaketa ekimen bat ere proposatzen dute, eta, horrekin batera, PRISM oztopatu edo saihesteko bideak eskaintzen dituen webgune informatibo bat ere.

Kanpainaren beste sustatzaile garrantzitsu bat Mozilla fundazioa da. Bereziki garrantzitsua da Mozilla, software libreko Firefox nabigatzaile ezaguna aurrera ateratzen duen fundazioa baita. Batzuetan zalantzan jarri ohi da Firefoxen ekarpena, Chrome bezalako nabigatzaileen aurrean. Kasu honetan argi geratu da bataren eta bestearen interesak zeharo ezberdinak direla; hala, Firefox PRISM programaren aurkako kanpaina sustatzen ari den bitartean, Chromeren sortzailea den Google auzian zuzenean inplikatuta dago.

Bada, hala ere, gustatzen ez zaidan ikuspuntu anglosaxoi bat honetan guztian. Alde batetik, egindakoaren tamaina ikusita, eskariak, horixe dira: eskari. Batzuetan, gainera, eskasak benetan. Gertatutakoari buruzko informazioa eskatzera soilik mugatzen dira eskariotako asko. Beste alde batetik, AEBetako herritarrak espioitzaren jomuga izan zitezkeelako lehertu da guztia. Erreklamazio asko ere hortik doaz, AEBetako herritarren eskubideak bermatzea eskatuz. Horrelako neurri batek ez du mugarik, AEBetako herritarren eskubideak bermatuta baleude ere, nahikoa litzateke kanpoko estatu batek berdina egin eta AEBei datuak ematea. Arazoa globala da, ez etxe barrukoa.

Hala ere, argi utzi behar dugu gure inguruan horrelako legeak ezagutu izan ditugula. Are gehiago, orain dela urte asko aplikatzen ari zaizkigu, bai Espainian bai Frantzian. Gai hauekiko kezka hedabideek AEBetan gertatutako zerbait azaleratzean bakarrik baldin badugu, jai dugu. Horren erru osoa guk dugu!

Edward Snowdenek egin duena ez litzateke delitu izan behar, azken finean, AEBetako legeen aurka eginez, ezkutuan, herritarrak zelatatzen ari direla salatu baitu. Besterik ez. Internet aske mantentzen saiatu izana da leporatu ahal dakiokeen gauza bakarra. Internet aske bat izan gabe, gauzak aldatzea zailagoa izango da. Horra hor ekimenon balioa.

Artikulu hau Gaur8 astekarian publikatu da.

Erlazionatutako bidalketak:

Google I/O 2013: Zer berri?

2
google_io_2013

Egilea: Tregoning | Lizentzia: cc-by

Urtero egiten dira Google I/O konferentziak. Googlek azken berrikuntzak erakusteko eta publikatzeko erabiltzen ditu konferentzia hauek. Mundu osoan ikusmira handia sortzen dute eta konferentzietan agertzen diren datuak blog eta medio askotan azaltzen dira. Azken aste honetan 200.000 orrialde baino gehiago idatzi dira Interneten Google I/O konferentziari buruz.

2013ko edizio honetan mugikortasuna, eta bereziki Android, izan dira protagonista nagusiak. Mugikortasunaren merkatua etengabe doa goraka eta Google berarentzat berebiziko garrantzia dauka. Aurtengo albiste nagusienetako bat, azken urteetan izan den moduan, Android mugikorren aktibazio kopurua izan da. Dagoeneko, 900 milioi gailu aktibatu dira Android sistemarekin. Eguneko 1,5 milioi gailu aktibatzen omen dira.

Googlek goranzko joera hori baliatu nahi du eta azken hilabete eta urteetako joerari eusten dio. Google+ indartzen ari da, eta, honen ekosistema, handitzen. Google+ proiektuaren logikatik kanpo geratzen diren egitasmoak deuseztatu eta beste asko bertara batu dituzte. Norabide horretan aurkeztu dute Google+ bertan integratuta datorren Hangaouts berria. “Integrazioa” izan da aurtengo hitz gakoetako bat. Gaur egun Google Talken egin daitezken ekintzak egin ahal izango dira, eta, gainera, argazkiak eta bideoak partekatzeko aukera ere egongo da. Talk ordezkatzera dator Hangouts, baina oraindik “integrazio” gehiago falta dituela dirudi. Ez dirudi SMS zein Google Voice zerbitzuen bateratzea oraingoz egingo dutenik, baina, aldaketa honekin, WhatsApp, SpotBros eta antzeko aplikazioei aurre egitera dator Google.

Bat-bateko mezularitzaz bakarrik ez, konferentzian jokoez ere aritu dira. Jokoen merkatuaren goranzko joerari ere zerbitzu berriak eskaini dizkio Googlek. Google Play Games izan da aurkeztu duten jokoen plataforma sozial berria. Famatuagoak diren Xbox Live edo Apple Game Center ezagunen antzeko zerbitzuak eskainiko ditu. Googlek jokoen garatzaileei baliabide berriak eskainiko dizkie. Baliabide horiei esker, jokoen partidak hodeian gordetzeko aukera izango da, lorpen sistema bateratuko da, on line klasifikazioak izango dira, jokalari anitzen arteko jokoak… Zerbitzu horiek guztiak Android jokoetan inplementatu ahal izango dira. Orain arte Googlek utzitako hutsune horiei esker sortu izan dira antzeko zerbitzuak ematen dituzten plataformak, baina, hemendik aurrera, Google etxearen apustu berri honekin, etorkizun iluna izango dute.

Eta jokoen plataformetatik, musikaren plataformara. All Access izeneko zerbitzua ekarri digu Googlek. Denok ezagutzen dugun Spotify zerbitzuari konpetentzia egitera datorren zerbitzu berri honek, Google Play Music zerbitzarietan dagoen musika guztia entzuteko aukera emango digu, tarifa lau bat ordaintzearen truke. Tarifa lau horren prezioa 10 dolar ingurukoa izango da. Guk gustuko dugun musika guztia ez da on line zerbitzu hauetan izaten, baina Googlek gure musika igotzeko aukera ere emango digu (Groovesharken bezala), edozein momentutan, edozein lekutan gaudela, guk nahi dugun musika entzuteko aukera emanaz.

Berrikuntza gehiago ere aurkeztu dituzte: Google Now, Google Maps, Google Play for Education… Baina gehienak aldaketa txikiak edo aurreikusitako hobekuntzak izan dira. Google proiektu berritzaile askotan sartuta dago, baina ez du interes handirik horien inguruko informazioa oraindik zabal dadin. Android 4.3 bertsio berriaren hutsunea ere nabaria izan da. Android software librea dela askotan esan izan dugu, baina kodearen zabalpenak gero eta konplikatuagoa dirudi. Android komunitatearen garatzaileen haserrea eta mesfidantza nabaria da, eta, egunetik egunera, goraka doa. Android sistema nagusi da mugikorren merkatuan, baina datozen hilabeteetan publikatuko diren sistema mugikor berriekin, Firefox OS sistemarekin batez ere, posizio hori mantentzea ez zaio orain arte bezain erraza egingo. Azkenaldian, ekitaldi mota hauek sortzen duten ikusmira, bertan aurkezten duten informazioa baino garrantzitsuagoa izaten da. Google ere Apple beraren antza hartzen ari da

Artikulu hau Gaur8 astekarian publikatu da.

Erlazionatutako bidalketak:

Harresiak elkartzen

0

Erresistentzia betean ari dira Bulebarrean bildutako gazteak lerro hauek idazten ari naizen bitartean. Oihuak, besarkadak, txaloak… Gauean Ertzaintzaren bi atxilotze saiakera gainditu dituzte. Aske Gunean antolatu den herri harresia indartsu ari da lanean.

jendea_ordenagailuetan_ibiltzen

Egilea: AskeGunea | Iturria: AskeGunea Facebook

Bertatik bertara egonda bakarrik senti daiteke Bulebarrean bizitzen den indarra eta elkartasuna. Baina bertaratu gabe ere Aske Gunean bizitzen ari direna, hein handi batean, komunikatzea lortu dute. Komunikazio lantalde propioa du Aske Guneak. 24 orduz eta etenik egin gabe informazio guztia blog baten bidez eta sare sozialen bitartez komunikatzen ari dira. Kamerak, mugikorrak eta ordenagailu eramangarriak dira talde honen lantresnak.

Donostian gertatzen ari dena Euskal Herri osora bakarrik ez, mundu osora zabaldu nahi dute. Bertan, boluntario askori esker gertakarien kronikak hizkuntza desberdinetan idazten ari dira. Hala, zortzi gazteen aldeko manifestua bera ere bost hizkuntzetara itzuli dute. Auzolanean bideoak grabatu, itzuli eta muntatzen dituzte. Blogaren bitartez argazkiak ikus ditzakegu, datozen orduetako egitaraua begiratu, baita zuzeneko bideo emisioak jarraitu ere. Arkanoid bideo-joko bat ere moldatu dute Herri Harresia irudikatuz.

Hau guztia Twitter eta Facebook sare sozialetatik zabaltzen ari dira. Twitterrekoa bereziki, minutuz minutuko informazio jario bilakatu da. Gomendioak, animoak eta alertak etengabeak dira. Twitition zerbitzuaren bitartez “EAJri Herri Harresiaren parte izateko eta Aske Gunera Ertzaintza ez bidaltzeko deia” izeneko sinadura kanpaina abiatu dute. VisibleTweets zerbitzuarekin, aldiz, tabernetan, eskoletan, kalean lantokian edo pantaila bat dagoen edozein lekutan #askegunea traola jarraitzeko bisualizazioa prestatu dute. Lan horri guztiari esker Aske Gunearen mezua Interneten lau haizetara zabaldu ahal izan dute. Nazioartean ere medio desberdinetan publikatu dituzte zortzi gazteen inguruko berriak; hala, #basque8 espainiar Estatuan TT izatera iritsi da. Internet informazioz bete dute.

Zentsura ere bizitzen ari dira, aste honetan Aske Gunearen erdarazko hizkuntzen Twitter erabiltzaile kontuak itxi egin baitizkiete. Kontuok berriz ere martxan dauden arren, ekintza honek argi erakusten digu zerbitzu zentralizatu hauek eragin dezaketen kaltea gure komunikazio jardunetan. Sare zentralizatu hauen aurrean sare banatuak hobetzen eta zabaltzen joan behar gara (blog sareak, sare sozial banatuak…), aurrerantzean horrelako arazoak ekidin ahal ditzagun.

Komunikabide askok Bulebarrean geratzen ari denaren berririk ematen ez duten bitartean, etengabeko jarraipena egiten ari dira Argia (@larbelaitz) eta Info7 (@iontelleria); bertatik bertara ari dira informazioa ematen, zuzeneko audioak eta bideoak sareratuz.

Ez dakigu Bulebarreko harresiak noiz izango duen amaiera, baina Euskal Herrian sortzen ari den harresi partekatua ezin izango dute bota, ezin izango dute inguratu, ez baita leku bakarrean egongo. Harresi bakoitzaren atzean beste bat aurkituko dute.

Artikulu hau Gaur8 astekarian publikatu da.

Erlazionatutako bidalketak: