Archive by Author

8219321

0
android_bug

Egilea: nikiball1| Lizentzia: cc-by-nd

Azken boladan segurtasunaren eta pribatutasunaren inguruko kezka areagotzen ari dela dirudi. Azken gertakariek zerikusia izango dute, ziur, baina espero baino jende gehiago ari da gai hauei buruz kezkatzen. Oraingoan, Android telefono sakelakoetan aurkitutako akats bati buruzko hausnarketa batekin natorkizue.

Gutako askok erabiltzen dugun sakelakoentzako sistema eragilea da Android, eta 8219321 gisa izendatu duten bug-a aurkitu dute. Akats horren ondorioz, 1.6 bertsiotik aurrerako Android sistema guztietan arazoak sor daitezke.

Akats horren ondorioz, ustez ziurra den aplikazio batek erabiltzen duen sinadura kriptografikoa aldatu gabe, aplikazioa bera alda liteke. Horrek zera esan nahi du, erasotzaile batek aplikazio hori molda lezakeela konturatu gabe, gure sistema erasotzeko.

Dirudienez, akatsa BlueBox laborategietako Jeff Florristalek topatu du, eta horren berri zehatzagoa emango du Black Hat USA 2013 konferentzia ezagunean.

Aurretik Googlerekin harremanetan jarri eta akatsaren berri eman zuen Florristalek. Googlek jada konponketak egin ahal izateko bideak jarri ditu jendearen eskura. Komunitateak mantendutako Cyanogen Mod oinarritutako banaketa ezagunenetakoak ere, bere azken bertsioan proposatutako aldaketak sartu ditu.

Bada konponbidea eskura edukita oraindik soluziorik eman ez duten telefono konpainia eta gailu sortzaile asko. Eskura edukita eremu horietako askok ez dituzte beraien Android sistema moldatuaren bertsioak berritu. Batzuek, gailu zaharrei dagokienez beharbada ulergarria da, baina asko dira berriak izanda ere berritu ez dituztenak.

Horren inguruan iritzi askotarikoak egon daitezke, baina panorama tamalgarria da. Beren bezeroen iritzia eta segurtasuna interesatuko ez balitzaie bezala jokatzen dute. Hori baino gehiago, zaharkitze planifikatu kasu argi bat dugu aurrez aurre, argi eta garbi.

Espero dut pribatutasunarekiko sortutako kezkak jarraitutasuna izatea, horrelako kasuak ez gertatzeko edo behintzat horietan eragin negatiboa izateko. Bitartean, Androiden kodea eskura dagoenez, dakienak edo interesa duenak baditu bideak arazoa, hori bai, bere kasa konpontzeko. Ez da gutxi, baina, halere, ez da nahikoa.

Artikulu hau Berria egunkarian publikatu da Irlen Sarea atalean.

Erlazionatutako bidalketak:

Talaios hedabideetan

3

Azken hilabeteetan ohikoak diren Taosa  irratsaioa, Amarauneko partaidetza eta Berriako eta Gaur8ko artikuluez gain hedabideetan oihartzun zabala izan dugu. Lehena, Bilboko EITBko egoitza nagusian egin zen EBE Euskadin “Negozioa, euskara eta Internet” izeneko hitzaldia.

Bigarren, Gasteizko AEKak antolatutako jardunaldien barnean  “Internet eta aldaketa” hitzaldiaren harira Hirinet atariak eta baita Zuzeuk ere egindako elkarrizketa bana. Bukatzeko, Radio Euskadiko Boulevard saioan ere, blogen inguruko udako atal berri bati hasiera emateko egindakoa. Esker mila guztioi.

Udako ikastaroak – BigBlueButton eta PopCorn

2

Urtero bezala UEUk udako ikastaroen eskaintza zabala egin du. Aurten Talaiosek horietako bat emango du BigBlueButton, PopCorn eta IFTTTri buruzko ikastaroa hain zuzen ere. Datu guztiak UEUren webgunean dituzue, baina hona hemen laburpen bat:

Ikastaro informazioa

  • Hasiera-data: 2013(e)ko uztailaren 17a
  • Amaiera-data: 2013(e)ko uztailaren 18a
  • Tokia: Eibar – Markeskoa Jauregia
  • Ordutegia: Astean zehar. 9:00-14:00
Izena eman

Eusko Jaurlaritzaren irakasleen formaziorako plangintzaren bidez homologatutako ikastaroa

 

Hezkuntzan batez ere, baina baita hortik kanpo interesgarriak izan daitezkeen hainbat tresna eta zerbitzu ezagutaraziko dira. BigBlueButton bideo hitzaldi eta elkarlanerako online tresnak dituen aukerak erakutsiko ditugu. Popcorn maker bidez, bideoetan edizio lanik egin gabe testuak, irudiak, audioa eta kanpoko zerbitzuen informazioa (Wikipedia, Twitter, Google Maps) txertatzen ere ikasiko dugu. Amaitzeko, IFTTT zerbitzuaren bidez zerbitzuen arteko automatizazioa landuko dugu, interesatzen zaizkigun informazioak jaso edota zabaltzeko estrategia berriak landuz.

 

 

M25 Eraldalab: Ekonomia elkarrekintzailea

8

Martxan da EraldaLab berri bat. Aurten ere OlatuTalkaren barnean, baina oraingoan Donostian. Maiatzaren 25ean arrantzale kofradia hartuko dugu ekonomia elkarrekintzaileari buruz hitz egiteko. Hala ere, beti bezala teknologia ardatz beste gai batzuk jorratzeko eta era irekian proposatzeko aukera ere izango da. Egitaraua gehiago argitzen joango gara, baina momentuz izena ematen hastea eskertuko genizueke.

Ya está en marcha de nuevo EraldaLab. Este año también dentro de OlatuTalka, pero esta vez en Donostia. El 25 de Mayo tomaremos la cofradía de pescadores de Donostia para hablar de “ekonomia elkarrekintzailea” (la traducción es difícil, sería algo así como economía del (emprendizaje) comunal). Además, habrá como siempre, la posibilidad de proponer abiertamente otros temas relacionados con la tecnología. Iremos publicando más información sobre el programa, de momento os agradeceriamos que os fuerais apuntando.

eraldalab_kofradia_m25

Egitaraua

9:00 Irekiera
9:30 Harrera
10:00 [hitzaldiak] Irla ekonomiko eraldatzaileak hitzaldiak (euskaraz)
11:30 Atsedena
12:00 [hitzaldi irekiak] Proiektu eta ideia eraldatzaileak (hizlariaren hizkuntzan)

14:00 Atsedena
15:30-17:30 [tailerrak] Tailer teknosozialak (euskaraz)

  • Lupulu ikastaroak etxean garagardoa egiteko
  • Piratebox elkarlanerako unitate mugikorra

18:00 [mahaingurua] Ekonomia eraldaketarako ereduak (sarrerak hizlariaren hizkuntzan | mahaingurua gazteleraz)
20:00 Amaiera

Krisi garairako 4 herri tresna

3

Aurrekoan, ekonomia eraldatzen hasteko hiru ideia proposatu genituen. Ideia batzuk proposatzeko garaian garrantziaren araberako neurri eskala ere proposatzen genituen bertan. Neurri mota bakoitzeko, herri batek, kirisi garai hauetan bereziki, erabili ditzakeen lau tresna teknologiko proposatzera ausartu gara gaurkoan: lan direktorioa, udal jarraipena, enpresa direktorioa, proiektu komunalak…

Krisi-garairako-4-herri-udal-tresna

Lan direktorioa (neurri integratzailea)

Inguruko lanen eskaintza eta eskaera bideratzeko ataria. Normalean eremu gertukoak diren lan eskaintza eta eskaerak publikatu eta jarraitzeko tresna.

Udal jarraipena (neurri soziala)

Udalaren ekimenak jarraitzeko eta lanak auditatzeko tresna. Herritarren laguntzaz suertatzen diren arazoak konpontzen laguntzeko  eta udalarekin arazoen konponketa bideratzeko tresna.

Enpresa direktorioa (neurri lokala)

Herriko enpresa eta negozioen direktorioa, eskaintzak eta kupoiak egiteko tresna. Herriko enpresen ezagutza handitzeko eta negozio txikiei komertzializazio aukera berriak eskaintzeko.

Proiektu komunalak (neurri komunala)

Herriarentzako proiektu komunalak proposatzeko tresna. Proiektu komunalak egiteko ideiak jaso eta herriko agenteekin batera aurrera eramateko pentsatutako tresna.

Lau tresna sinple, baina erakundeak eta herritarrak elkarrekin gauzak aldatzen hasteko pauso garrantzitsuak.

Ekonomia eraldatzen hasteko 3 ideia

6

Ekonomiaren egoera dela, eta batzuek krisiaren aitzakia erabiliz, normalitatearekin ikusten ditugu jendarteari proposatutako murrizketa neurriak. Horien aurrean erresistentzia estrategiaz gain ez da proposamen askorik egiten, baina han eta hemen badira martxan jartzen ari diren proposamen txikiak, eta bakoitzak bere ingurunean ere ikusten ditugu edo bururatzen zaizkigu zenbait irtenbide.

ZamakonaTalaios

Erakunde batek gure iritzia eskatu eta hauek dira proposatu genizkien hiru ideia labur, beti ere teknologiaren prismatik, baina baita hortik haratago ere.

1.Indikadoreak eta neurri eskalak

Indikadoreak oso garrantzitsuak dira jendarte baten garapena eta batez ere berau osatzen duten pertsonen ongizatea neurtzeko. Hauetako batzuk BPGa kasu, ez dituzte ezaugarri horiek ondo neurtzen laguntzen. BPGak adibidez gizartearen aberastasunaren media kalkulatzen du, izan daitezkeen ezberdintasunak kontutan hartu gabe.

Ondorioz, erabiltzen diren indikadoreek, eta batez ere hauekin egindako interpretazioek, ideologia gordetzen dute bere baitan. BPGa kontutan hartuz, gure ekonomia eskala makroan besteekin konparatzen dugu, baina jendartearen egituraketa, aberastasuna, ongizatea… kontutan hartu gabe. Bai, segur aski BPG altu bat duten herriek errazago izango dute faktore horietan ere goian egotea, baina ez du zertan.

Gizarte batek berdintasuna, zoriontasuna, gizarte garapena… kontutan hartu nahi baditu neurgailuak ere garrantzitsua dira. Badira gauza horietako batzuk neurtzen laguntzeko beste era bateko indikadoreak:

  • GINI indizea: Gini koefizientea aberastasunaren banaketa (edo metaketa) neurtzeko indize bat da.
  • HPI:  HPI indizeak bizitza kalitatea, zoriontasuna eta jasangarritasuna neurtzen du. Hiru parametroz dago osatua: bizitza itxaropena, jasotako ongizatea, aztarna ekologikoa.
  • GPI: GPI Nazio Batuen Garapenarako Programak sortutako neurketa berezia da. Hiru parametroz osatuta dago: Bizitza luzea eta osasungarria, hezkuntza, bizitza maila egokia.

Neurri konkretuak ezartzeko indikadoreez gain neurgailu eskala sinpleak ere sor ditzakegu. Sailkapen sinple batekin nahikoa izan daiteke behintzat erabakiak nondik-nora hartu nahi diren zehazteko. Lehentasunak definitu beharko lirateke eta noski, behar ekonomikoen araberako sailkapen bat egin.

Arlo teknologikoa hartuz, eskualde baten beharretan softwareak ekonomian izan dezakeen eragina aztertuko bagenu adibidez, har daitezkeen neurrien sailkapen hau egin dezakegu: neurri integratzaileak, sozialak, lokalak eta komunalak.

Neurrien eskala

Neurri integratzaileek, jendartearen teknologietara atzitzeko eskubide unibertsalak ziurtatu behar dute. Interneteko azpiegitura publikoak, software librearen hedapena, alfabetatze teknologiko orokorra… Izan daitezke neurrietako batzuk.

Bigarren mailan, neurri sozialak daude. Arazo ekonomikoak dituzten herritarrak laguntzeko bereziki sortutako zerbitzuak bideratzeko tresna teknologikoak izan daitezke hauek. Elkartrukea sustatzeko sareak edota lana topatzen laguntzeko jendarte sareak esate baterako.

Ondoren, neurri lokalak datoz. Hau da, herri edo eskualde horietako ekonomia lokala sustatzeko tresna teknologikoak. Merkataritza lokala sustatzeko zerbitzuak edota enpresa lokalen arteko hartu-eman sareak eraikitzen laguntzeko zerbitzuak adibidez.

Amaitzeko, aurrera begira ere aukera gehiago sortzeko proiektuak ziurtatuko dituzten neurri komunalak. Proiektuak gauzatzeko baliabide teknologikoak eta teknologia enpresa sareak sustatzeko laguntzak adibidez hemen kokatu beharko lirateke. Beti ere, sortuko diren egiturak izaera komunala badute.

Neurri eskala horietatik kanpo gelditzen dira neurri pribatuak. Hau da, interes pribatu hutsak sustatzeko laguntza bideak. Erakunde publiko baten laguntzen artean, laguntza hauek mugatuak izan beharko lirateke beste mailak asetu bitartean. Hauek asetuta ere neurri komunalak ere neurri pribatu bezala uler daitezke. Bertako laguntzak maila pribatuan ere lagun dezakeelako, aberastasun komuna sortzen duten bitartean. Aberastasun hori ezagutza, baliabideak, ongizatea… izan daitekeelarik.

2012 2025
Neurri komunalak %10 %40
Neurri lokalak %20 %30
Neurri sozialak %30 %20
Neurri integratzaileak %40 %10

Neurgailu eskala horiek indikadore egokien bidez parametrizatu eta neurtzeko bideak jarriz gero, etorkizunera begirako helburuak zehatz daitezke. Jendare justuago bat lortzen hasteko, maila bajuagoko neurrien behar erreala txikitzea lortu beharko genuke. Lehen urteetan behe mailako neurrietan egindako inbertsioak etorkizunean behar hori txikiagoa izatea ekarriko luke eta beraz goi mailako neurrietan inbertsio gehiago egin ahal izateko aukera.

2.Katalizatzaile teknologikoa

Edozein ekonomia erabakietan teknologiaren erabilera sustatzea beharrezko bezala ikusten da. Hori horrela bada ere teknologia txertatzeko bideak ez dira jartzen. Zergatik ez da orduan enpresetan eta jendartean teknologia hori txertatzen lagunduko duen ekinbide bat sortzen? Katalizatzaile teknologiko honen egin beharretako batzuk hauek izan daitezke.

  • Ezagutzaren kudeaketa landu: Ezagutzaren kudeaketa egoki baten bidez ekinbide ekonomikoak errazago mantendu eta garatu daitezke. Tresna teknologikoak baliatuz, enpresetako ezagutza digitalizatu, metatu eta transmititzeko bideak definitzen lagun daiteke.
  • Barne prozesuak eraginkorrago bihurtu: Enpresa batzuetan aurrera eramaten diren prozesuetan, eraginkortasuna hobetzeko teknologia txertatzeko bideak azter daitezke.
  • Sareak eraikitzen lagundu: Entitate ezberdinen artean ezagutza, negozioak eta elkarlana sustatzeko sareak, teknologia bidez sortzen lagundu.
  • Komertzializazio bide berriak landu: Teknologia baliatuz salmenta bide berriak landu eta inplementatzeko aukera aztertu.

Katalizatzaile teknologiko baten ekinbide zehatzago batzuk aldiz hauek:

  • Ezagutza libreko baliabideak: Dokumentu modeloak, modelo ekonomikoak, dokumentazio txantiloiak…
  • Software libreko baliabideak: Software librean oinarritutako produktuak sortu eta egokienak bildu.
  • Azpiegitura teknologikoak: Enpresen behar teknologikoak asetzeko azpiegiturak.
  • Aholkularitza teknikoa: Erabaki teknologikoak hartzen laguntzeko aholkularitza.
  • Bilgunea: Elkarrekin harremanetan jartzen laguntzeko tresnak.

 

3.Ekintzailetasun ereduak eta ekintzailetasun komunitarioa

Jende askoren ustetan ekintzailetasuna sustatzea da krisitik ateratzeko bidea. Aspertzeraino zabaltzen saiatu diren mezuak, baditu hertz ugari. Hala ere, egia da enpresa berriak behar izango direla; aurreko egoerara bueltatuko garela uste duenak jai du.

Ekintzailetasuna sustatu nahi duen edozein erakundek erabakiak hartzeko garaian jarraitu beharreko modeloa aztertu behar du. Sortu nahi den hori lortu ahal izateko ekosistema egoki bat behar izaten da eta hori sortzeko eskemak ere mila. Eskema orokor bat baliatuz, ekintzailetasun ekosistema batek behar dituen faktore minimoak izan daitezkeenak ikusi eta ondoren zenbait ideia konkreturekin beteko ditugu.

Modelo orokorrean hiru bloke ikus daitezke. Lehena medioa (jendartea + merkatua), bideratzaileak (politikak + modeloa), katalizatzaileak (laguntzak + espazioak).

Medioa

  • Jendartea: Pertsonek hauen kultura eta baloreak, pertsonen arteko harremanak eta hauek bideratzeko sortutako erakundeek osatzen dute.
  • Merkatua: Jendarteko pertsona, enpresa eta erakundeek trukea egiteko erabiltzen dituzten sistema, erakunde, prozedura, azpiegitura eta gizarte harremanek osatzen dute.

Bideratzaileak

  • Politikak: Lortu nahi den ekintzailetasun eredua lortzeko politikak, batez ere orain arteko ereduak eraldatzera bideratuak.
  • Modeloak: Lortu nahi den ekintzailetasun eredu berriak sortzeko modeloak, batez ere sortuko diren ekimen berriak bideratzeko.

Katalizatzaileak

  • Laguntzak: Lortu nahi den ekintzailetasun eredua lortzeko laguntzak, batez ere orain arteko ereduetan eraldadatzeko katalizatzaile
  • Espazioak: Lortu nahi den ekintzailetasun eredu berriak sortzeko espazioak, batez ere sortuko diren ekimen berriak sortzeko katalizatzaile.

Ekintzailetasun komunitarioa

Ekintzailetasun komunitarioak komunitatea du oinarri. Ekintzaile komunitarioa sustatu nahi duen ekintzailetasun eredu batek ondorioz, medio zehatz batetik abiatuz bideratzaile eta katalizatzaile egokien bidez komunitate ekonomiko berriak sortzea du helburu.

ekosistema ekintzailea

Medioari dagokionez, komunitate horiek jendartearekiko izan behar duten atxikimendua adierazteko, jendartea merkatuaren gainetik jarri behar da. Ekimen berriek jendartearekiko atxikimendua beren biziraupenerako zein merkatu berriak topatzeko garrantzitsuak dira. Hala ere, merkatua ere errealitate den garaietan muzin egitea ezinezkoa da eta beraz ekimen berriek kontutan hartu beharreko gauza garrantzitsuenetako bat izan behar du.

Beste alorretan hauek izan daitezke kontutan hartzeko eredu edo adibide batzuk:

 

Bizi dugun egoera honetatik abiatuz etorkizun hobeak eta justuagoak eraikitzeko tresna propioak behar ditugu. Tresna hauek gainera eskala txikitik eskala handira begiratuz eraikitzen baditugu, komunitate ekonomiko berriak sortuz eta jendartearen beharrei erantzunez, bidea egiteko oinarri sendoa izango dugu. Ideiak eta adibideak badira, baina orain hauek sustatu eta sendotuko dituen ingurunea behar da.

Pasaiako badiako historia eta istorioak ezagutzeko aukera

5

Pasaia bokana

Jakina da Talaioseko kideok itsasoarekin eta itsas merkataritzarekin dugun lotura. Gure mitoak hortik jaiotzen dira: Bakalhau, Orion, baleazaleak, talaiak, kofradiak, portuak… Eta ez da kasualitatea, izan ere mito horien sortzaile nagusietako bat izan daitekeen Pasaiako badia, gure bulegotik kilometro batera dago, berez gure bulegoa dagoen tokian duela urte asko untzi-ola bat omen zegoen.

Gai hauen inguruan gero eta gehiago jakin eta ikastea atsegin dugu, eta horregatik datorren astean izango dugun aukera paregabea probestuz Pasaiako badia hobeto ezagutuko dugu Ereiteneko lagunen eskutik. Gurekin batera etorri nahi baduzue izena eman, jakin ezazue gu osteguna apirilak 4ean joango garela, animatu!

Hemen dituzue ekimena eta izen emateari buruzko detaile gehiago:

Pasaiako udalak, Gipuzkoako Aldundiak eta Ereiten enpresak elkarrekin antolatu itsas ondareari buruzko “hondotik ondara” jardunaldien barruan, apirilaren 4ean eta 5ean doako bisita gidatuak antolatu dira Pasaiako badian zehar. Motoran.

4koa euskaraz eta 5eako gazteleraz. 11etan hasiko dira.

Izena emateko pasaiakobadia@ereiten.com

Badiaren espazioa lehorretik eta itsasotik ikusteko aukera izango dugu, zatarrak iruditzen zaizkigun auzoetan edertasuna aurkitzen, ohituragatik baloratzen ez dugun paisaiakin harritzen eta desagertu den ondarea bilatzen.

Maremagnum 0.2

0

800px-1592_4_Nova_Doetecum_mr

Aste honetan bereziki gure Uhartetik datoz notiziak, baina Talaiosen ohikoa denez ez dugu etorkizunetik bista kentzen, hemen da Maremagnum 0.2:

Maremagnum

Maremagnum hitzak oparotasuna, nahasmena, handitasuna adierazten du, itsaso zabalari aplikatu izan zaio historian zehar. Informazio itsasotik nabigatuz egiten ditugun azterketa eta analisien parte txiki bat publiko egin eta zuekin partekatuko nahi dugu honekin.

Egunero 300 iturri baino gehiago jarraitzen eta aztertzen ditugu eta horiekin analisi ezberdinak egin prospektiba lanak, eragin azterketak, sare egituren analisia… Horietako batzuekin aurrerago beste txosten landuago batzuetarako azuolaguntzan oinarritutako harpidetza sistema bat jartzea ere pentsatzen ari gara, baina Maremagnum beti izango da denontzat eskuragarri.

Analisiak lau kategoria izango ditu normalean:

  • Uhartea: Euskal komunitatearentzako gai interesgarriak.
  • Portuak: Momentuan interesgarriak zaizkigun guneak.
  • Iparrorratza: Gure jomugan dauden gai interesgarriak.
  • Astrolabioa: Joerak, prospektiba eta etorkizuneko gai potentzialak.

Maremagnum 0.1

1

800px-1592_4_Nova_Doetecum_mr

Egunerokoan egiten dugu gure kooperatibarentzat interesgarria den informazioaren filtroa, horretarako iturburu ezberdinetako jario anitzak erabiliz.

Maremagnum informeen publikazioa proposatu genuenean horren adibidetxo bat erakustea zen gure asmoa, astero gainera. Lehen aste hauetan guk erabiltzen dugun tresna hobetzen aritu gara, eta horregatik atzeratu da bigarren informe hau. Orain azken pausoa falta zaigu, informeen sorrera automatizatzea. Tresna hobetzen dugun bitartean  0.x Maremagnumak publikatzen jarraituko dugu, ahal dela astero.

Maremagnum 0.1 alea duzue hemen, informazio interesgarri askorekin. Orain informazioa ezagutza bihurtzea eta etekina ateratzea guztion lana da:

Maremagnum

Maremagnum hitzak oparotasuna, nahasmena, handitasuna adierazten du, itsaso zabalari aplikatu izan zaio historian zehar. Informazio itsasotik nabigatuz egiten ditugun azterketa eta analisien parte txiki bat publiko egin eta zuekin partekatuko nahi dugu honekin.

Egunero 300 iturri baino gehiago jarraitzen eta aztertzen ditugu eta horiekin analisi ezberdinak egin prospektiba lanak, eragin azterketak, sare egituren analisia… Horietako batzuekin aurrerago beste txosten landuago batzuetarako azuolaguntzan oinarritutako harpidetza sistema bat jartzea ere pentsatzen ari gara, baina Maremagnum beti izango da denontzat eskuragarri.

Analisiak lau kategoria izango ditu normalean:

  • Uhartea: Euskal komunitatearentzako gai interesgarriak.
  • Portuak: Momentuan interesgarriak zaizkigun guneak.
  • Iparrorratza: Gure jomugan dauden gai interesgarriak.
  • Astrolabioa: Joerak, prospektiba eta etorkizuneko gai potentzialak.